“E lē faatusatusaina mai le talo a Fiti i taumafaiga o le talo mai Samoa”
O le toe tatala o le maketi i Niu Sila mo le talo mai Samoa, sa avea o se tala lelei mo le ‘au faifaatoaga ma le Malo auā e lelei tele tupe maua sa maua ai i tausaga ua mavae a o lei salalau le faama‘i lega na fasi mateina le talo Samoa mao’i lea e faaigoaina e tatou o le talo Niue.
O le afioga Tusani Samotu le isi tina faifaatoaga o le atunuu sa faamaopoopo i taumafaiga mo le toe aveina o le talo i Niu Sila, peitai ua sisii ona lima ona o le leaga o le tau.
Ua silia i le $20,000 se tupe ua maua e Tusani Samotu o Savaia Lefaga mai le faatauina atu i Niu Sila o ana taga talo, mai uta e tolu sa ave ina ua toe tatala le maketi o le talo mai Samoa i lea atunuu.
“E na o le $1 Niu Sila i le kilo lea ua ofo mai e se kamupani i Niu Sila, ma ua tau faatutusa le tau ma le talo mai Fiti, ae leiloa e fai lava si faigata o le mea lea o loo feagai ma matou ona o loo saili le talo sili ona lelei e ave i fafo”. O le faamatalaga a le tina ina ua fesiligia pe aisea ua lē toe aveina ai lana talo i Niu Sila. Fai mai Tusani Samotu e feololo pe ana faapea o loo iai se fesoasoani a le Malo i le tau o vailaau.
“O le taimi mulimuli ou te alu atu ua pa‘ū mai le tau o le fagu vailaau i le $600 tala”. O le vailaau lea o loo fana ai le vao, ona faato‘ā totō lea o le tiapula, ae ese foi le isi ituaiga o vailaau e fana ai le to‘aga pe a ola.
O le tina o Samotu ua faaee i ai se tasi o suafa matai tāua o le Tusani i lona nuu o Savaia i Lefaga. Sa tele isi ana pisinisi sa faagaioia e pei o faleoloa, ae o le taimi nei ua tuu uma lona malosi i le totoina o le laueleele, e pei ona ia faaalia e tusa ma le 100 eka le tele o le fanua ua faato‘a i le talo.
O le taimi nei ua sailiili atu o ia i taumafaiga a nisi fai faatoaga o loo fuafua e ave le latou container poo le pusaoloa o taga talo i Hawaii i le masina fou.
Peitai o se upu i le maketi i Niu Sila na faamatala le tina fai faatoaga, afai o le tau e $1 i le kilo o le a faatau atu ai le talo mai Samoa, ailoga e iai se fai faatoaga e toe fia auai. O le faaaliga tele a le aufaifaatoaga lea sa faia i le malae o tuugasolofanua i Tuanaimato sa tauva ai ma le tina o Tusani Samotu e pei ona sa molimauina e lua ituaiga o talo sa lesitala ai i le tauvaga.
O le talo muamua poo le talo uli ma le talo lona lua poo le talo mūmū. O talo ia o loo pito lelei lona aano mo le maketi i fafo e pei ona faailoa mai e Tusani.
“E sili atu ona lelei la‘u tupe maua i la‘u talo o loo tiliva ma faatau atu lava i lo tatou atunuu, ae fai si gau i le toe ave i Niu Sila”. O le afioaga o Savaia o se tasi lea o nuu o loo malosi ai le unaia o le totoina o le laueleele i faatoaga.
O se tasi foi lea o afioaga e maopoopo tele le pulega a alii ma faipule i le faamalosia o aiga e atina‘e faatoaga auā e lē gata e tua lelei i ai le fofoga taumafa o le nuu, ae o tupe pe a selesele ma faatau atu i le au leai ni faatoaga talo.
O le luitau a Tusani Samotu, e lē mafai ona toe foi le talo a Samoa i le tulaga sa iai muamua i le maketi i Niu Sila pe a lē liliu le toatele o le atunuu e toe taumafai ma atina‘e. O se itu lea e mafai ai ona faatauva ma le talo mai Fiti o loo numera tasi i Niu Sila.
