O le suesuega a leoleo agai i le minisita lagolago o le Matagaluega o fefaatauaiga pisinisi ma alamanuia le afioga Muagututagata Peter Ah Him ona o se tagi a se kamupani mai Saina e ta‘ua o le Grand Ocean Company, ua faailoa ai e se molimau o se alii leoleo sinia e faapea, ua taunuu ia suesuega i le faia o ni moliaga faasaga i le minisita lagolago. O le faamatalaga foi a le molimau e faapea o le moliaga o le taufaavalea poo le false pretence ua molia ai Muagututagata.
Peitai ina ua faataalise atu le sailiga i le ofisa o leoleo i le Aso Faraile ua mavae, e lei mafai e le faauluuluga o le vaega suesue i le ofisa o leoleo i Apia ona aumai se faamaoniga o moliaga. Na faaalia e le faauluuluga le susuga Samoa Muliaga, o loo faia pea suesuega ma o nisi o vaega o le suesuega ua tuuina atu i le ofisa o le Loia Sili a le Malo.
Na ioe mai foi o le a tuu atu se taimi e silasila ai i le mataupu na oo atu ai le tusitala ona valaau mai lea. E oo mai lava ina tuu atu lenei lipoti mo le faasalalauina e lei toe manuia taumafaiga i le fia talanoa atu i le faauluuluga i lana telefoni feaveai.
O le sui Komesina o le matagaluega o leoleo na ia faasino le tusitala i le faauluuluga o le CID poo le ofisa suesue ma se tasi o leoleo sinia le afioga Afamasaga Samuelu, peitai sa lē mafai e ia alii leoleo ona faailoa mai faamatalaga uma faasino i moliaga lea e faapea mai le molimau a se alii leoleo na faia ia moliaga faasaga i le minisita lagolago i le Aso Lua 10 o Iuni 2014.
O le tagi a le kamupani mai Saina faasaga ia Muagututagata e mafua mai i se faiga faapisinis ma le alii minisita lagolago lea sa faaaogā ai se fanua o le alii minisita lagolago i Lelata e tuu ai ni pusaoloa poo container a le kamupani. Sa tapa e Muagututagata o se tasi o loo umia le 10 pasene o sea o le Grand Ocean Company se taui tupe mai le kamupani ona o le faaaogāina o lona fanua e teu ai pusaoloa.
Sa faia la se faamasinoga o le mataupu lenei ma ua faaalia i se tasi o lipoti a se tasi o nusipea na faasalalauina i le masina o Fepuari o le tausaga nei e faapea na manumalo ai le finau a le kamupani.
O moliaga ia e faapea mai le molimau o se alii leoleo, na faia e leoleo i le Aso Lua ua mavae faasaga i le minisita lagolago, na ta‘ua lava e le molimau lea ua toe faia i ai se feutanaiga mo le toe faauiina i tua.
E iai le talitonuga atonu o le mafuaaga lea na lē mafai ai ona aumaia se faamatalaga ma‘oti mai leoleo. O se tasi o molimau na ia faaalia na oo le minisita lagolago ma faia sana talosaga i se sui o le kamupani i Samoa ina ia toe aumai i tua le latou tagi ua ave i leoleo ae o le a taumafai e soalaupule ma teuteu le mataupu i tua.
Na maua le avanoa e fesiligia ai le loia a le kamupani le susuga Ainuu Katopau mo sana faamatalaga i le mataupu ma le tagi a le kamupani. Na faaalia e le alii loia e lei logoina atu o ia e leoleo poo ua fai ni moliaga ae o le a fesootai i ai pe afai ua iai ni moliaga ua fai.
Na fesootai atu foi i le Loia Sili a le Malo le afioga Aumua Ming Leung Wai ma ia ta‘ua e lei oo atu se faila mai leoleo i le mataupu ae masalo e pei ona ia saunoa mai, ua tiliva atu le faila. E faaeteete foi se finagalo o le Loia Sili e faaali i le mataupu i lana saunoaga mai o se mataupu e ma‘ale‘ale (sensitive matter).
