O le faiaoga sa galue i se Aoga tulagalua o le a lē faailoa le nuu o loo iai, ae o le aoga lea ua tulai mai ai tuua‘iga o le aafia o ni fanau tama laiti i ni amio matagā a le alii faiaoga ua 40 ma ona tupu tausaga o lona matua.
O se mataupu ua faaoo ai e le Ulu Aoga se lipoti i le ofisa autu o le Matagaluega o Aoga, Taaloga ma Aganuu, ma logo i ai le faamalolo o le alii faiaoga ona ua loka e leoleo.
“O lea ua oo mai le lipoti a le Pule Aoga, ae e lē o silafia e le Ofisa Sili o Aoga se mea na tupu. Na faatoa ia silafia ina ua tutū atu nisi o le komiti ma logo atu ai le ave e leoleo o le alii faiaoga”, o le faamatalaga mai lea a le susuga Laulu o le vaega o le School Operation i le ofisa autu o Aoga i Malifa, ina ua saili atu i ai se faamaonia o le mataupu.
E leai se faamatalaga na maua mai leoleo, ae o le Pelesetene o le Toomaga mo ē Puapuagatia le faletua o Siliniu Lina Chang, na ia faaalia o loo fesoasoani i le galuega a leoleo i le mataupu. O lana saunoaga e 15 tausaga o se tamaititi ua nofo nei i le vaaiga a le Toomaga, ma o le alo tama laitiiti lea o loo masalomia na aafia i ia amioga matagā. Fai mai foi Siliniu o loo iai isi tamaiti o loo masalomia na faia i ai ia gaioiga peitai o loo faigata le latou galuega ona e lē o mafai ona gagana ane tagata o le nuu aemaise lava mātua ma tagata o aiga o tamaiti o loo masalomia.
O le tausaga na tea nei na faaalia e le Pelesetene o le Toomaga na oo atu ai se logo mai se alii papalagi sa iite o loo faia e le faiaoga ia uiga i tamaiti. Peitai na faamatala le pelesetene sa faigata ona mautinoa ma maua ni molimau ona sa lē fia talanoa atu se tasi o le nuu. O lea la ua iai le molimau ma o le saunoaga a Siliniu Lina, ua latou taumafai nei e sailiili pea isi fanau o loo masalomia i le faia i ai o ia gaioiga matagā.
“O le matou galuega e fesoasoani i leoleo, ae o le pitolaau lava a latou (leoleo) e faia moliaga ma tuuina atu i le faamasinoga”.
Ua lē mafai ona faailoa le suafa o le faiaoga ma le nuu o loo iai le aoga ona o le puipuia ma liolio i ni aafiaga o fanau, aemaise o lea e lei oo le mataupu i le faamasinoga. O le masina nei lava o Me ua faamoemoe e fofogaina ai moliaga o le alii faiaoga.
