Mulimuli le Faleula i le tusi faalupega a le EFKS

O le lomiga muamua o le Tusi Faalupega a le Malo lea na maua i le tausaga e 2003, sa iai nisi o nuu ma afioaga na lagomia ai finagalo ona o ni suiga i o latou faalupega, aemise o lagi, suafa o Sa‘o Tamaitai ma Tulaga maota.
O le feteenai o talitonuga o matai ma tagata o nuu e mafua ai ona lē sagatonu faalupega o se afioaga, se foaiala poo se itumalo o le atunuu.
O le tusi faalupega a le Ekalesia Faapotopotoga Kerisiano Samoa le EFKS na lomia i le vaitaimi o le 1900, e pei ona faaalia e le Minisita o Tina ma Tamaitai o loo iai le komiti o le Faleula, o le taiala lea i le tuufaatasia o le tusi faalupega a le Malo.
I se talanoaga ma le alii minisita na ia tautino mai ai, e leai se mea e tasi o faalupega o nuu ma afioaga, poo lagi, ni tulaga maota ma isi lava vaega faapena o suia e le Malo pe faia foi e nisi ni faaiuga.
O le saunoaga Tolofuaivalelei Falemoe, e saini aao loa alii ma faipule o se nuu i se faalupega ona faapena lea ona tuuina i totonu.
A iai foi ni faalupega e suia ona o ni faaiuga a le Faamasinoga o Fanua ma Suafa, e faapena lava ona faatino ma usitaia e le Faleula le faamasinoga.
“E fai faalogo le matagaluega ma le Faleula i le finagalo o le faamasinoga, ma e leai se mea matou te faaopoopo pe toese”.
O le lomiga lona lua na faalauiloa i le Aso Faraile na te‘a nei 9 o Aukuso 2013, lea na faatau ai i se tau pa‘ū e $40 tala, ae o le vaiaso nei ma le agai atu i le lumanai e limasefulu tala i le tusi.
Na faailoa mai e le minisita o le tau foi lea o le faatau ai i Niu Sila, Ausetalia, Hawaii, Amerika, ma Tutuila ma Manu‘a. E iai nisi o tusi o faalupega e pei o le tusi na saunia e se tasi o faafeagaiga o le ekalesia Metotisi le susuga Faleatua ua tuumalo, faapea le Tusi Faalupega na saunia e se tasi o faletua le susuga Aiono Dr Fanaafi Le Tagaloa, peitai o ia tusi faalupega e lē o faaaogāina e le Malo e fai ma taiala o lana tusi faalupega, ae ua na o le Tusi faalupega a le EFKS.
Faaalia e Tolofuaivalelei Falemoe, e sili atu ona lagolagoina e le toatele o tagata o le atunuu faapea pulega a nuu le tusi faalupega lea, ma o le mafuaaga foi lea o le faaaogāina e le Malo mo lana Tusi Faalupega.
Ua sefulu tausaga talu ona maua le lomiga muamua o le Tusi Faalupega a le Malo, ae ina ua fesiligia le alii minisita pe ta‘i fia tausaga ma iloilo pe faia se review, na ia saunoa mai e lē o mautu le tulaga lea.