Muliagatele Brian Lima, ‘E lelei le lakapi, lelei foi le fusu’

E le toe tau faailo le taleni taalo lakapi a le afioga Muliagatele Brian Lima i le tatou ‘au a le Manu Samoa e pei ona sa tautua ai mo tausaga e tele.
E leai se isi uigi saosaoa ma se pu‘e numera tasi na ta‘uta‘ua lona talaaga i lona foi vaitau i le taaloga lakapi, aemaise i le vaitau o le Ipu o le lalolagi 1991, o ia foi o se alii taalo pito i laititi o le taamilosaga i lena vaitaimi.
O Muliagatele o loo umia foi le matatia o se tagata taalo lakapi lea ua lima Ipu o le lalolagi o auai ai talu mai le Ipu o le lalolagi i le 2007 i Farani.
Peitai, ua toe logologoā mai foi tala o lenei alo Samoa, ina ua manumalo i lana fusuaga i le tu‘i oti i le la taaloga ma le alii sa taalo lakapi i le ‘au faavaomalo a Aialani o Shane Byrne.
O lenei faamoemoe sa faia i Dubai i le faaiuga o le vaiaso, na tuufaatasia o se fusuaga e saili seleni ai mo se tasi o charity ua faaigoaina “Back on your Bike”. Na mafua lenei faatasiga, ona o le moomia o le tulaga tau seleni e se tasi o alii tietieuila e lauiloa i totonu o Dubai o Richard Holland na aafia i se faalavelave tau taavale, ma lē mafai ai ona faaauauina le taleni.
O le tausaga na tea nei a o koleni Holland mo le tauvaga tietie uila vilivae ua faaigoaina o le Iron Man, na faafuasei ai ona so‘a ma laveai ai i se taavale ma mafua ai ona manu‘a tigaina, e oo mai lava i le taimi nei.
O ona manu‘aga e fai si ogaoga tele ma o le mafuaaga lea o le auai o Muliagatele ma nisi o alo ta‘uta‘ua i le lalolagi i le taaloga o le lakapi, e soosoo tau‘au ma ofo le fesoasoani e fusu ai, auā lenei sailiga seleni.
E lei tuumāmāina e Muliagatele lana paga, e ui o se alii ta‘uta‘ua i le ‘au a Aialani, peitai na lipotia mai, e lei taitai lava manifi le malolosi o aao o le tatou tama, auā na pau lea o le fusuaga i lea po, na mae‘a i le tu‘i oti. O se taaloga matagofie e ui i le mamao o Dubai sa faia ai, ae ua agiagia ai foi le fu‘a o Samoa i nei atunuu mamao.
O se tasi o fusuaga mataina foi i lea po, o le va lea o le alii taalo lakapi, former All Blacks, Carlos Spencer manumalo i lana paga o le alii taalo kilikiti mai Egelani o Adam Hollioake. O lē sa tufaatasia le fusuaga o le susuga a John Mamea-Wilson, ma le faamoemoe e maua se seleni e sili atu i le AED500,000 mo le fia fesoasoani i le Back on Your Bike charity ma le foai seleni mo Richard Holland.