E toalua se auso tama mai le nuu o Lano i Savaii o loo faatalia nei se faaiuga a le faamasinoga i o la moliaga o le taumafai e faaoo le maliu ma le faaoo manu‘a tuga.
O le toalua o lo la tuafafine na aafia i ni manu‘a tuga mai le faalavelave na tupu ia Fepuari o le tausaga nei.
I tolaulauga a leoleo na faaalia ai o le mu o le ogaumu tao popo a le aiga, na mafua ai ona ma‘ema‘eā le auso tama i le toalua o lo la tuafafine, i lo la talitonuga na susunu e lē na aafia i le faaoogalima le ogaumu tao popo, ma la faaaogā ai loa se agaese ma se maa e faaoolima ai.
O ogalima ma le itu, faapea le ulu o lē na aafia na manu‘a i le agaese ma le maa, ma o le molimau a le fomai na laki tele le vave i le falemai semanu e aliali mai se faaletonu ogaoga e au ina uma ai lona soifua.
O Tamiano Papalagi Samoa 40 tausaga le matua o ia lea na aafia i le faalavelave.
O le ogaoga o ona manu‘a na aumai ai i Apia ma taofia i Motootua i le falemai o Tupua Tamasese Meaole lea na faia ai se taotoga e toe faaleleia ai se tasi o ponaivi o le sooga o se tasi o ona lima na tuga se afaina i le agaese.
