Ou te manatu, na fau ao fau po, moomooga ma le tofa saili malo, i le Fono Aoao a Samoa i Sini i Ausetalia e pei ona saunoa i ai le afioga a le Peresitene Sitagata Atonio Tominiko, i le tatalaina aloaia o le mafutaga ua i lalo o le latou faamalumaluga, o le Samoan Seniors Group Blacktown/Penrith Councils.
Faafetai ua taulau le faamoemoe, na atofaina ona o le alofa mutimutivale o lo tatou Tamā o i le lagi.
Faafetai foi i le Fono Aoao a Samoa i Sini i Ausetalia, aemaise le mamalu lasilasi o le mafutaga a tagata matutua Blacktown/Penrith Councils, ae tainane foi le komiti faafoe i le afioga i le Peresitene, o Tagaloa Tago Filipo, Failautusi Priscilla Mariner, Teutupe Oloa Henke, Faatamā faufautua Laufili Tuaimau, ona o lo outou maelega, galulue punoai ma le saili malo, ua tino mai ai ma faataunuuina ma le manuia lenei miti matagofie.
O le Aso Lulu i le sefulutasi i le taeao, i le nofoaga tutotonu a Blacktown City Council, na silamiō ai ona o vaaiga faagauloto i le felanulanuai o teuga a tina ma tamā Samoa, e fai o le lautetele o o latou sei, o le seki o mamanu o o latou laei, iila o vali laugutu, ae pei o le laufofoga fiafia ma le sagisagi mai e faafeiloai le auvalaaulia, na maitauina e le Samoa Times.
Ai ua matuā faagaeetia o latou finagalo, ona o le tatalaina aloaia o la latou mafutaga, lea na matuai mafuli i ai le Samoan Seniors Group Blacktown/Penrith Councils, e tuu atoatoa i ai le faimea lelei ma le faimea mafai, ia latou sauniuniga uma, aemaise le lava saunia ma le manogi manaia o taumafa eseese.
Na maualuga foi lenei aso, i le toatele o malo faaaloalogia na mafai ona lagolagosua, e amata mai auauna a le Atua o loo faatautaia fata faitaulaga o Ekalesia eseese, o pulenuu mai Blacktown ma Penrith Councils, o tamalii ma failauga o loo faauluulu i ai mafutaga eseese, o sui togia o kamupani tetele, o alo ma tama fanau Samoa faipisinisi, ma le au faafiafia faapitoa a le Samoan Seniors Group Canterbury/Bankstown Councils, e faauluulu i le tina ia Iliganoa Sanele, o i latou foi o se isi mafutaga, i lalo o le faamalumaluga a le Fono Aoao a Samoa i Sini Ausetalia.
O le tamaitai failautusi lava o le mafutaga, Priscilla Mariner na avea ma fofoga o le aso, ae na taitaiina le sauniga e le ta‘ita‘i o le Ekalesia Aso Fitu o le Koneferenisi mai Mt Druitt, Susuga Asofitu Leatuavao.
E pei ona masani ai i faamoemoe faapenei, o le taiala lava ma le faasinomaga o i tatou, o le mua i malae o se faafetai faalēlava ona o le Atua ma lona mana ua taulau ai aiga ma le manū lenei miti matagofie, auā Samoa e, nai o tatou tuaa, o loo alaala ma papaaao i laumua o Sini nei.
E toafā malo faaaloalogia na saunoa e tala‘i mo ni feau tāua, poo ni timaiga mo lenei faamoemoe.
O le uluai saunoaga, o le Pulenuu o Blacktown City Council, Alan Pendleton, e momoli lana faamalo i le manatunatu ma le saili malo o o tatou tagatanuu. E 180 gagana eseese i totonu o lana puleaga, ae o lea ua amanaia foi Samoa ona o le mafutaga muamua lenei a tagata matutua mai se atumotu Pasefika i lenei vaipanoa.
O le faagaeetia tele o i latou, ua foaina fua ai le faaaogāina o le nofoaga tutotonu mo lenei faamoemoe, lea e tusa le tau ma le afe limaselau.
Lona lua o saunoaga, o le Pulenuu o Penrith City Council, Kevin Crameri, na faafetaia foi le valaaulia atu o ia, ua molimauina ai le mautu o a tatou taumafaiga atina‘e, ma o mafutaga faapenei, e tatau ma onomea lona tāua e lē gata i tagata matutua, ia saga faamausali ma faamanatu ai tu ma agaifanua a si o tatou atunuu, ae tufatufa mai ai foi le tamaoaiga o lo latou malamalama mo tupulaga fai a‘e.
O le afioga i le Peresitene o le Fono Aoao Samoa i Sini Ausetalia, Sitagata Atonio Tominiko, na ia tautino moomooga ma faanaunauga, ae lē gata i lea o le tofa saili malo o le fono, ina ia ata mai lenei miti matagofie ua faatinoina.
O lenei atina‘e, ua aofia lea ia latou polokalame fuafuaina mo le isi lima tausaga.
Na avea le afioga i le Peresitene o le mafutaga fou, Samoan Seniors Blacktown/Penrith Councils, Tagaloa Tago Filipo, e fai ma fofoga taumomoli o le mafutaga, ona ua paepaeloa lenei faamoemoe i Samoa fai uso, tupu, ee, ma tamalii, aemaise le tele o faamanuiaga mai faafeagaiga na faaavanoaina o latou taimi e sapaia i latou.
Faafetaia foi e le afioga i le Peresitene le agalelei ma le soosoo tau‘au mai, ua foaina ai e ala i le aao foai ma sausaunoaga faa-Samoa le tino i tupe e $2,862.75, ae ua ofoina mai foi e le afioga a le Peresitene aoao o le Ekalesia Faapotopotoga Kerisiano Ausetalia ma Niu Sila (Puleaga Papalagi) Alan Aloese Filipaina, na te faaatoaina se‘i maua ai le $3,000.
Toe faaiila foi taleni a o tatou tuaa, e ui ina o nisi ua tau pulapula lagoto o latou soifua, ae muliga foi faafiafiaga a Cindy ma le vaega, i le toe vavai ma le onomea o i latou i le faafiafiaina o le au valaaulia.
I le saunoaga mulimuli mai le susuga a Rev Alan Aloese Filipaina, lea na talosagaina ai e le afioga Tagaloa Tago Filipo, ni ana toe faamanuiaga mo le mafutaga tau atinae, ma se‘i faaiuina ai foi le faamoemoe.
Tali o ia, “o le upu lea o le senior poo le tagata matua, ua ou faauigaina, o le tagata ua lava ma totoe lana tautua, o ana galuega, o lona malamalama, aemaise o loo teufatuina ni tamaoaiga se tele mo i matou, o lona uiga o i matou faifeau, poo faipisinisi, tusa poo le oo i le lagi o matou iloa, e tatau ma e matou te faalatalata mai ia te outou, e maua atu ai o matou manuia.”
Talosia foi le tupulaga faia‘e o loo tauvaleaina ai i tatou ma le igoa pele o Samoa, avea lenei mafutaga e na te aapa atu e faaleleia ma faafaileleina o latou olaga. Ona taape ai lea ma faaiuina lenei faamoemoe, i le itula e tolu.
E fai o le manaia o nai fautuaga mai tuaa matuutua, o le faamalieina o le vaai, seki le laualo, ae faafetai ua atili faalauiloaina ai la tatou nusipepa.
O o matou alofaaga ma moomooga ia tumau ai pea le alualu i luma, o lou saili malo Samoa e, aemaise atina‘e ma fuafuaga faataatia a le Blacktown/Penrith City Councils, faafetai ua taulau lo outou faamoemoe.
