Moomoo le Palemia ia toatele nisi e galulue i galuega laveai

O le saunoaga lea a le Alii Palemia le susuga Tuilaepa Lupesoliai Sailele Malielegaoi i le tapunia lea o se tausinioga na auai atu i ai nisi e to‘a 41 i le tomai o galuega laveai i taimi o faalavelave.
O le tausaga lona lua o lea tauvaga ua faatautaia e le Pulega o Tagata Tafafao mai i Fafo ma le Ofisa o Ausetalia i Samoa ma ua faaluaina le aofai o i latou na tausinio i lenei tausaga pe a faatusatusa i le tausaga na tea nei ina ua faatoa amata lea faamoemoe.
Faaalia e le Alii Palemia, e fai o le aogā o aoaoga ua maua e i latou uma ua tauva i le laveai muamua lenei, ae o se avanoa lea a maua e isi talavou e mafai ona agai ai e saili galuega aemaise i faletalimalo ma mataaga o loo toatele i latou i le tauvaga lenei ua maua ai galuega. O se tomai ua aogā foi i potopotoga ma tafaoga a aiga ma faalapotopotoga ae tulai mai ai ni faalavelave faafuasei.
O le fale aau i Tuanaimato na faatautaia ai le tauvaga lenei e pei ona vaevaeina i aau o le ta‘i 50 mita, o le aau e 100mita ma le aau e laveai ai se tagata. O le faatinoga o le fesoasoani muamua e tatau ona ave i soo se tasi ua malemo.
Na faamamafa e le Hai Komesina o Ausetalia le tāua tele o le iai o lenei tomai i soo se tagata. O le tomai e faasao ma laveai ai soifua, e pei ona ia ta‘ua ma e lē gata mo tagata Samoa ae faapea foi tagata tafafao maimoa mai i fafo.
O se alii mai i Ausetalia ua faapea ona galue i le Pulega o tagata tafafao maimoa mai i fafo e faatautaia nei aoaoga, o David Guest na ia faafetaia le maualuga ua iai le malamalama o sui tauva uma.
Faaalia e lenei alii ua manino le aoga o aoaoga ma o le a tele le puipuiga o le saogalemu o le a faatautaia i nofoaga mo tafaoga a tagata uma i Samoa ona o le tomai ua maua e i latou na tauva.
O le manumalo aoao o le tausinioga o lenei tausaga na maua lea e le alii o Andy Efeso Masoe mai i le McLean Electrical sosoo ai Peter Tufuga o le faletalimalo o le Coconuts Beach Club and Spa.