Moomia tulafono, faiga faavae ma tupe e faamautu ai isi malosiaga

O le finagalo lea o le Faatonu o le Ofisa o le Siosiomaga i le Pasefika (SPREP) i le fono lea faatoa mae‘a atu a Taitai o le Pasefika ina ia unai le sailiga o nisi auala e maua ai malosiaga e faaaogā e le Pasefika e ese mai i le suauu.
O le faamatalaga a le alii o David Sheppard, ua tele atumotu o le itulagi ua faamauina a latou galuega ina ia saili ai isi auala e maua ai malosiaga e pei ona maua mai ai le eletise auā o le tele o le tupe e alu i fafo a atumotu laiti ua agai i le faatauina o le suauu mai i atunuu mamao e gaosi ai le eletise, ae e pei ona vaaia i atumotu laiti o le itulagi, ua tele galuega ua faatino nei e pei o Tokelau ua ola i le malosiaga o le la lana eletise.
E le gata i lea o atunuu e pei o Samoa o loo i le ogatotonu o le faatinoga o lea foi faamoemoe auā o le 60% o le eletise a le atunuu o loo maua mai lava i le suauu ae o le isi 40% ua sau i lana suavai maua.
O se galuega tele ua faagasolo ina ia mafai ai ona gaosi le eletise i le malosiaga o le lā.  O loo faia foi galuega ina ia mafai ai ona gaosi le suauu mai i le popo e sui ai le suauu lea e faatau mai i fafo i le lumanai.
O le tulaga foi lena i le tele o isi atumotu laiti, ma na ta‘ua e David Sheppard e tāua tele lenei galuega o loo faatautaia e atumotu o le itulagi pe a faaopoopo i ai tulafono ma faiga faavae aemaise i auala e taofi ai le sao atu o le kasa oona o loo faaleaga ai pea le siosiomaga.
O le tausaga e 2011 na amata ai se polokalame o loo taitaia e le Faalapotopotoga o Malo Aufaatasi ina ia saili auala nei e maua ai isi malosiaga e saogalemu ai le siosiomaga, ma o le polokalame lenei ua faaigoaina o le PIGGAREP i le faapuupuu o le Gagana Peretania, o loo ua faamalosia ai le galuega fai faatasi a Malo taitasi, atoa ai faalapotopotoga tumaoti i atunuu uma ina ia tuuitiitia le faaaogā o auala e sao ai le kasa oona i le ea, ma ua iai le faamoemoe o le Pasefika ina ia oo atu i le tausaga e 2015 ua faaitiitia lea tulaga i le 30%.
Faaalia e le faauluuluga o le Lala o Atina‘e a Malo Aufaatasi, o Helen Clarke, talu ona amata lea polokalame ua silia i le 70 atunuu tau atiae ua ofi atu ai.
Faaalia e lea tamaitai, o le galuega o le sailiga o isi malosiaga faalenatura, ua faia ma le faamuamua ua ave i le malosiaga e talafeagai ma motu eseese, ma e iai le faamoemoe e oo atu i le 2030 ua telē se suiga lelei i le malosiaga ua faaaogā ina ia puipui ai le siosiomaga.
O galuega ua faatautaia nei i le Pasefika mo lea faamoemnoe ua aofia ai atunuu e pei o le Atu Kuki, Kiripati, Fiti, Nauru, Niue, Papua Niu Kini, Samoa, le Atu Solomona, Tonga, Tuvalu ma Vanuatu. E $533 miliona tala Amerika le tupe ua faamautu mai e le Malo o Niu Sila atoa ai le Iuni a Europa mo le faatinoga o galuega ma suesuega i le Pasefika auā le sailiga o malosiaga nei e pei ona ta‘ua.
O le fono lea na talimalo ai Niu Sila lea ua faamautu mai ai loa ma le fesoasoani lenei ma ua unai ai ma le sao o faalapotopotoga tuma‘oti ina ia galulue foi i latou e faamalosi le sailiga o auala e mafai ai e atumotu taitasi ona faaaogā malosiaga faalenatura nei auā le tuuitiitia o le faaleagaina o le siosiomaga ae e lē gata i lea o le faasao ai o le tupe alu a atumotu mai i le tau o le suauu o loo tele ina faaola ai o latou eletise ma isi manaoga o le soifua i le Pasefika.
I lea tupe ua faalauiloa o le $212 miliona tala Amerika ua fuafua mo le agai sa‘o lava e fesoasoani ai atinae, ae o le isi $317 miliona tala Amerika ua fuafua e aumai faanonogātupe mo atinae e 40 ua faataatitia i le taimi lenei mo le sailiga o malosiaga nei.
O Niu Sila ma le Iuni a Europa na faalauiloa lea fesoasoani ae o loo iai foi ma le tupe i lea aofaiga atoa mai i le malo o Ausetalia, o le Faletupe o Atinae a Asia, o le Faletupe o Atinae a le Iuni o Europa, o le malo o Iapani, le Faletupe a le Lalolagi ma le Malo Tuufaatasi o Arapi (United Arab Emirates).
O le faamoemoe o le mae‘a o nei atinae o le a faapea ona palasi i le afa le faalagolago o atunuu uma o le Pasefika i le suauu mo malosiaga faaeletise o loo faamoemoe i ai.