Moomia tele faaetete tagata Pasefika i le swine flu

I faamaumauga lata mai nei ua tuuina mai e le Matagaluega a le Soifua Maloloina, ua faaalia ai, e maualuga o le aofai o tagata o le Pasefika ua faamaonia le aafia i le faamai o le Influenza A (H1N1) 09, (swine flu).

Taua e le faufautua sili mo le Matagaluega a le Soifua Maloloina, Dr Api Talemaitoga, ma le faatonu sili o le Matagaluega o Mataupu tau Atumotu o le Pasefika, Dr Colin Tukuitonga e faapea, “o loo iai le atugaluga i lenei lipoti, e ui lava o se tasi o pogai o lenei fuainumera ona o tagata ua pesia mai a o iai i nisi atunuu ma faapea ai ona pepesi solo le fulu i totonu o o latou nuu ma afioaga”.

“E ui i lea, ou te matua talosagaina lava tagata Pasefika uma ina ia matua faaeteete ma ia faaauau pea ona tausia masaniga lelei mo le puipuiga lelei o le soifua maloloina, ina ia taofia ai le pepesi atili atu o siama o lenei fulu,” o se saunoaga mai ia Dr Tukuitonga. “E masani o tatou tagata i le faifaimea faatasi, ma e toatele foi o tatou auaiga e masani i le feasiasiai, peitai ua tatau ona tatou faaeteete teisi lava mai na faatasitasiga, ina ia faaitiitia le vave o le pepesi o lenei fulu.”

Taua e Dr Talemaitoga, e tusa ma fuainumera ua faaalia, o le toa 642 o i latou e oo mai le masina o Iuni ua faamaonia le aafia i siama o le Influenza A (H1N1) 09, e tusa o le 144 o i latou na o tagata Pasefika. O loo sia ona ogaoga le tulaga i lalo i Canterbury, lea o loo taua mai ai le toa 63 o i latou ua aafia.

O loo fautuaina foi fafine maitaga, o matua o loo iai a latou fanauiti, ma i latou o loo aafia i nisi faafitauli tau le soifua maloloina poo loo aafia i nisi gasegase, e pei o le ma‘i sela, ma‘i fatu, poo se gasegase foi o loo faafaigata ai le mānava (COPD), e tatau lava ona vave ona vaai se fomai pe afai ua pesia foi i auga o le fulu ma ua avea ma itu e lagona ai nisi aafiaga e pei o le tiga o le fatafata poo ua lagona foi le niniva e le masani ai.

O loo fautuaina le vave ona vili atu le telefoni a le Healthline poo se fomai e masani ona vaaia oe, pe afai e iai nisi ou gasegase masani, ma e ono maua fua mai ni au fualaau pe afai e maea ona siaki oe e se fomai ma ua faamautinoa ai lou moomia o na fualaau. O loo fautuaina foi i latou o loo galulue i le soifua maloloina ina ia taumafai e faatalanoa gasegase o tagata o le Pasefika, ina ia faailoa uma ane nisi o latou gasegase o loo aafia ai, aua o le tele o tagata e faalenaunau e faailoa faalauaitele na vaega o o latou soifuaga.

O loo fautuaina foi mo tagata o le Pasefika le tatau ona faaaoga lelei le fesoasoani a le Malo lea o loo ofo mai ai le tuipuipui mo le fulu, ma e faia e aunoa ma se totogi.