Ua vaaia le tele o le suiga o pepe Anastasia, talu ona muai lipotia le tulaga faigata o iai ma ua aapa mai le Faalapotopotoga o le Toomaga mo ē Puapuagatia ina ia saili se fesoasoani e avatu ai lea teineititi i Niu Sila mo se taotoga o ulu e lua ia na te tauaveina.
O lona tino ua alu atu lava, ae ua vaaia foi le vaivai o le ulu lona lua lea e pipii i tua ane o lona ulu, o le faamatalaga lea a le Peresetene o le Toomaga mo ē Puapuagatia, Lina Chang. O le faafitauli o le leai o se tupe e avatu ai Anastasia e fai i ai se togafitiga.
O se teineitiiti na fanau mai e vaaia lava le malosi ae o molimau a lona aiga ua tauau ina alu atu lava lona malosi i le vaivai ai o le isi ulu lea o loo pipii i le ulu o lea teineitiiti. O lea la ua faalauiloa le talosaga a le Toomaga mo ē Puapuagatia i le mamalu o le atunuu e alolofa atu i se tupe e ave ai Baby Anastasia i Niu Sila.
O le teineititi lenei i lona fanau mai na taofia lava i le falema‘i ae e leai se galuega na faia i ai se‘i vaganā le taofia ai mo sina taimi seia oo ina fai le faaiuga e aveese ma le falemai ae faatali se talosaga e ave ai i fafo.
O lea lava foi na fai faamatalaga a nisi o tina o lona aiga e iai foi a latou fomai o loo faatali i fafo e avatu ai lenei teineititi ae e oo mai i le taimi lenei e leai se tala ua toe aumai i le falema‘i e faatatau ia Pepe Anastasia, leai foi ma se tali mai a fomai a le aiga lea na ta‘ua.
O lea la ua taumafai le Toomaga mo ē Puapuagatia i se auala e laveai ai lenei teineitiiti ma e leai foi se lipoti mai le falema‘i e faatatau ia Anastasia ma le manaoga ua iai nei.
