E matuā moomia lava le maualuga o se leo o tamaitai leoleo i totonu o ofisa o leoleo i le Pasefika.
O se finagalo lea o se tasi o taitai leoleo tamaitai mai i Samoa o Sina Tafua i sana folasaga i le fono a tamaitai leoleo o le itulagi lea na talimalo ai Samoa i lenei vaega o le tausaga.
O Sina Tafua o le leoleo tamaitai aupito maualuga lea lona tulaga i totonu o le Matagaluega o Leoleo ma Falepuipui. Ua avea foi ma faauluuluga o le vaega o le Matagaluega o loo tali atu i Sauaga i Totonu o Aiga.
O lana faamatalaga na faia ina ua talanoaina le mataupu lenei o avanoa tutusa mo tamaitai leoleo i ofisa eseese o puipuiga i totonu o le Pasefika. O se autū na matuā tele i ai finauga ma folasaga ona o le manino e le‘i taitai lava oo i se tulaga e tali tutusa ai le numera o tamaitai o umia tofiga maualuluga i totonu o ia ofisa.
E lē gata ina laiti atu le numera o tamaitai leoleo i ofisa o leoleo a le itulagi, ae ua faapea foi ona laiti i latou e maua tofiga maualuluga i pulega o ia ofisa.
O se tasi lenei o mataupu na laualuga i ai le fono faaletausaga lenei a tamaitai leoleo o le itulagi.
E to‘a 53 leoleo mai i atunuu e 21 o le Pasefika o loo i Samoa mo lenei fono tele ma o le faaleleia lava o lenei auaunaga aemaise mo i latou o le itupa o tamaitai lea e vaaia ai potopotoga tetele faapenei ua faia i atumotu eseese o le itulagi.
O le fono o lenei tausaga ua talimalo ai Samoa ona o le tamaitai leoleo o Satini Sulipa Uelese na tofia e taitaifono i le tausaga na tea nei ae o le faatino ai i Samoa o lenei fonotaga ua aloaia ai ma le see atu o le tofi Taitaifono a lea Faalapotopotoga tele i le tamaitai leoleo Papua Niu Kini.
Faaalia e Sina Tafua, ua silia i le 20 tausaga o tautua o se leoleo i Samoa nei, e faigata tele le taumafai o tamaitai e oo atu i tofiga maualuluga o ofisa o leoleo ona o loo tele lava alii o loo pulea nei ofisa eseese.
Faaalia e lenei tamaitai, e solomua lava foi i tamaitai sinia o le matagaluega ona latou faafaigata le ofi atu ai o isi tamaitai i nei tofiga ma e faigofie ai ona faapea ane, “e toe oti lava tatou ia tatou”.
I se faaaliga a le tamaitai loia o Beth Onosemo lea ua ia pulea le Komisi a Tagata Faigaluega a Samoa – a o galue ai i le faatinoga o suesuega a le Matagaluega o Leoleo i tausaga ua mavae, na ia fesiligia ai le tele o tamaitai ina ia faaali ni faafitauli o feagai ma i latou e mafua ai le tau leai o ni tamaitai i tofiga maualululga o le Matagaluega o Leoleo.
“E leai ma se isi na faapea mai o loo iai ni faafitauli, ona pau le tali na aumai, e lē o iai lava ni faaletonu o loo matou fiafia lava i le galuega,” o se faaaliga lea a le tamaitai loia.
“Ae e uma le suesuega ae alia‘e ane faitioga ma tagi ua ave i le faamasinoga e faatatau i uiga faaalia a nisi o alii leoleo faasaga i tamaitai leoleo, a o lea na matuā gūgū lava i le taimi na fesiligia ai”.
“Ua iai suiga, “o se faaaliga lea a le taitai leoleo le tamaitai o Sina Tafua.
“O le tausaga na tea nei e toalua na siitia i tofiga o le au faitaai ma e toasefulu lelei tamaitai leoleo na siitia tulaga mai i tofiga ua tele tausaga o iai,” o lana tala lea.
“Ae toe la o tofiga Sui Komesina ma le Komesina o Leoleo lea lava e lei oo i ai se tamaitai talu ona faavae mai le Ofisa o Leoleo a Samoa”.
O le lu‘i a le Loia Sili o Samoa le afioga Aumua Ming Leung Wai i sana folasaga i lenei fonotaga, ua tatau ona lata mai se taimi e faatalofa atu ai i se tamaitai Komesina o Leoleo mai i le Pasefika auā e tutusa lava Samoa ma isi atumotu e lei iai lava se tamaitai ua umia se tofiga faapea i totonu o le itulagi.
O ā lava foi faafitauli na ta‘ua e Aumua e feagai ma tamaitai, e tatau ona malosi so latou leo tuufaatasi ona manino lea ua maualuga se laasaga e oo i ai.
O se finagalo ua matuā lagolagoina e sui usufono uma na auai mai i Samoa mo lenei faamoemoe.
