O le finagalo lea na faaalia e le Sui Sooupu o le Matagaluega o Leoleo ma Falepuipui, le Afioga Leaupepe Fatu Pula i le lē malie tele i faasalalauga o Tala Fou a le Leitio Polenisia – e faatatau i le mataupu o loo finauina e Magiagi, le Malosiaga tau Eletise ma le Alii Palemia.
O lea finauga o loo faatali fetusiaiga i le va o le nuu ma le alii Palemia ina ia saili ai se auala e mafai ona iai se maliega e faatatau i le mu fua o Magiagi i le eletise.
Ae o le faaiuga o le vaiaso na tea nei na faateia ai le afioaga o Magiagi i le manu o se potopotoga a taulelea o le afioaga. O le faaiuga o lea potopotoga na vaaia ai loa le toatele o taulelea ua leoleo le auala e agai mai i totonu o itu eseese o le afioaga.
O le faamatalaga e faatali le aufaigaluega a le EPC (Malosiaga tau Eletise) – lea na fuafua e amata ia Aukuso ona agai atu i maota o aiga i Magiagi e faapipii mita o le cash power ma amata ai loa ona totogi pili o le eletise a le afioaga.
E lei oo lea tulaga e oo mai i le taimi lenei ina ua alu atu le lipoti a le Leitio Polenisia ma faapea mai ai, ua folafola le Alii Palemia o le faamanuiaga na maua e aiga o Magiagi mai i nisi o le Pulega o le EPC na mafua ai le mumū fua. O tagata foi o le Pulega a le EPC na faia lea tulaga na loka uma lava i le falepuipui i Tafaigata. O se faamatalaga na faaaogā ai e le tamatai e ana le lipoti – se faatalatalanoaga a le alii Palemia i se vaega o lenei mataupu ma faalauiloa ai sana faamatalaga e faapea, na maua lava ia faiga piopio “auā e maua faiga piopio nei ma na loka uma lava i le falepuipui”.
Na faateia foi le Pulega o le Faalapotopotoga o le Malosiaga tau Eletise i lea faaaliga ina ua logotala i le lipoti, ma fesiligia poo fea e sau ai nei faamatalaga ona e lei iai ni faamanuiaga na ave ia Magiagi na mumū fua ai, ma e leai foi ni tagata o le pulega o le EPC na falepuipui ai i tausaga ua mavae i lenei mataupu.
Faaalia e le Afioga Leaupepe o le Matagaluega o Leoleo, na faia foi se fonotaga a leoleo i le tau saili ai o se filemu i lenei mataupu, ae o le alu atu o nei ituaiga lipoti lē moni e na o le atili ai o le faavevesi o le mataupu o lenei e tau saili se auala filemu e faagasolo ai feutagaiga.
“O le fono lea e fai ai nei iloiloga ia faatu mo le lima taitaina o galuega faatagata faasalalau ma tusitala, e matuā moomia lava ina ia taofi ai ituaiga faasalalauga faavevesi faapenei,” o se lagona lea o le alii Komesina Lagolago o Leoleo.
“E fai e tusitala ma le aufaasalalau ituaiga faaasalalauga nei, ae e lē o ane la e taofiofi le loto ita o tagata i le faalauiloa ai o nei ituaiga lipoti, ae o le leaga lava e sese,” o se faamatalaga lea a le alii Komesina Lagolago o Leoleo. Faaalia e le tamaitai o Leilua Ame Sene e ana le lipoti – o le alii Palemia na sau ai le faamatalaga. Na maua mulimuli e lo tatou ofisa i Apia, e ese lava le mataupu lenei ese le faatalatalanoaga lea na faaaogā e le tusitala mo le faamautu ai o lana lipoti.
O le faamatalaga na agiga a le Palemia i luga o le leitio na faatatau i le mataupu lea o Satapuala i fanua atoa ai se folafolaga a le afioaga o Magiagi e faaleaga meatotino a le Malo i totonu o le nuu pe afai e tape e le EPC le eletise e agai atu i le nuu.
O le faamatalaga a le alii Palemia soo se isi lava e faia se solitulafono, o le a faapea lava ona ave i le falepuipui. E lei iai se saunoaga na faia e faatatau i ni tagata o le pulega o le EPC ua loka ona o lenei mataupu, ma e lei iai se faamanuiaga na faia ma mafua ai le mumū fua o Magiagi.
O le fono lea e talanoaina i le toe fuataina o le tulafono, ua manatu le malo ua leva ona fautuaina le asosi o tusitala ma tagata faasalalau e faatino, ona o le tele o faitioga ua lagā e le atunuu ma nisi o ofisa o le malo, i le lē faamaoni o nisi o lipoti ua faasalalau ma tusitusia.
O le mafuaaga lea o le unai, a lē mafai ona faatino e tusitala lava ia ma tagata faasalalau, o le a me‘i ane loa le malo e faatū, ae o le fautuaga ia taumafai le asosi e galulue faatasi ma le Komisi o loo toe fuataina tulafono a le atunuu e vaavaai i le faamautu ai o se fono faapea.
Na faaalia e le alii Komesina Lagolago o Leoleo, atonu o le faatūina o se fono faapea e taofia ai ituaiga lipoti e pei ona agiga i le vaiaso na tea nei, ma taofi ai le ono tulai mai o vevesi e mafua mai ona o ia ituaiga lipoti.
Ua faamaonia foi e le Matagaluega o Leoleo, e leai nisi o le EPC na falepuipui i le mataupu lenei ma le afioaga o Magiagi. E leai foi ni tagata Magiagi ua aafia ai i se solitulafono ona o lenei mataupu.
