O le feau tāua lea mai i le Komesina o leoleo, Fuiavailili Egon Keil, mo mātua ia vaai lelei le fanauiti, aemaise lava i le matutua lea i le ta’i tasi tausaga le matutua, ona o le matutua tonu aupito sili ona vaavaai gata, ona o le naunau o le tamaitiiti i mea e fou i lana vaai.
O le saunoaga a le Komesina, ona e sosoo a faalavelave ua maliliu ai nai fanauiti. O le faalavelave muamua o le pepe e na o le tasi le tausaga le matua. O le lipoti na uma lona ola ina ua malemo.
O le fale o le aiga o lenei pepe e tuafale i le sami, ma e masalomia na savali i le sami le tamaitiiti ae lē iloa e se isi ma malemo ai. Faato’ā maua mulimuli lona tino maliu.
E nanati ane i le falema’i ae ua tuai ua uma lava lona ola. E iai le talitonuga o foma’i pe ana iloa e isi ona faatino le fesoasoani muamua semanū atonu e mafai ona faasaoina lona ola.
O le isi faalavelave matuia na uma ai foi le ola o se teineititi na o le 4 tausaga le matua, na so’a e le taavale ma uma ai lava lona ola a’o lei oo i le falema’i.
E faapea le faamatalaga o le teineititi na o ma lona tamā ma nai ona tei i Apia, ma o le toe foi i le aiga, na feosofi ai i lalo o le pasi, na alu lava le teineitiiti ma kolosi le auala, ae so’a ai e le taavale. Ua molia le avetaavale i le ave taavale faatamala ua aafia ai le soifua o se tagata.
O le isi faalavelave o le tamaitiiti e na o le 3 tausaga le matua o Faleula ma Faleasiu, e faapea na pa’ū i ai luga o lona ulu le televise poo le TV a’o matamata ma isi ona tei. O loo faia suesuega a leoleo i lea mataupu.
Saunoa le Komesina e tatau i tagata uma aemaise o mātua poo ai foi o tuu i ai le vaaiga o tamaiti ona faamuamua le saogalemu o le fanau laiti.
“E lē tatau lava ona tuulafoai faapea le fanau laiti, afai e malaga i Apia poo fea e o i ai ia vaai lelei, e faapena foi pe a tuu i le fale, e ao lava ona vaai faalelei.”
Saunoa le Komesina i le aufaasalalau, o se tulaga lē lelei le aafia o le fanau laiti aemaise o la e laiti e lei taitai ona matutua. O lo latou saogalemu e ao ona ave i ai le faamuamua aemaise lava i le matutua lea.
“E moomia lava ona toe faaopoopo i luga le faamuamua ma le saogalemu o le fanauiti, o a’u latou e oo lava i lo’u aiga ou te fautuaina le vaai i nai fanau laiti.” “O le tele o faalavelave e aafia ai le fanau laiti o le common sense aemaise o faalavelave e mafai ona puipuia mai i le aafia, ae e foliga mai e lē o avea i ai le faamamafa a mātua ma tagata matutua o aiga, mo lo latou saogalemu, o loo faatamala lava i le vaaiga o lo latou saogalemu.” “O faataitaiga lelei lava o faalavelave ia na aafia ai nai fanau, o faalavelave e mafai ona puipuia mai i le tupu, ae ua ma’umau ai soifua o nai nei tamaiti.”
“O lenei vaitau e eseese ma la aso, o matou vaitaimi e tamomo’e solo e leai a se faalavelave e tupu, ae o le mea lea ua vaaia i taimi nei, ua tele soifua ma’umau o nai tamaiti ona o le faatamala.”
Ua fautuaina e le Komesina aiga e tu lalata i vaitafe ia e vave lava ona tosina i ai tamaiti, ia manatua ona vaai lelei le fanau.
