O se aso ese ma se vaaiga matautia na molimauina ina ua faatino le valevale alofa ma le faamapu’eina o le Atua ma lona finagalo e ala i le soifua galulue ma le tautua lotu.
E lē gata i le afioga i le Sea le susuga ia Masunu Utumapu ma le faletua ia Senerita, faapea aiga na lua ma le Matagaluega.
Peitai e lei māmā foi i le Sinoti ma lana faatofala’iga e ala i lana tali faaaloalo ane, auā pelega o le Afioga i le Sea, Aiga ma le Matagaluega, ina ua tali atu e pei ana tu ma aga masani.
Na matuā faatumulia Falepapa, ma Malae Fesilafai o le laumua ma le nofoaga autū o le ekalesia i Manukau, i le mamalu o taitai ma le aufaigaluega a le Atua, aemaise tofiga, tamalii ma le mamalu o Samoa potopoto, i le molimauina ma le tali faaaloalo i le faamoemoe o le afioga i le Sea ma le faletua ma aiga na lua. O lea faamoemoe na faataunuu i le Aso Toonai, aso 27 Aukuso, 2011.
O le afioga i le Sea e pei ona tofia i le taimi nei, o suiga tofi ina ua mae’a le fono tele a le ekalesia sa faia i Samoa, i le masina na tea nei. Ua tofia ai le susuga ia Rev Masunu Utumapu, o le Faafeagaiga Ekalesia i Manukau, mo le tauaveina o le galuega.
O le tofia o Rev Masunu, o le tofia lava foi lea o le faletua ia Senerita e avea ma Peresitene o le Auuso Fealofani.
O le susuga ia Masunu ma le faletua ia Senerita, faato’ā atoa le tausaga talu ona filifilia ma siitia mai i Manukau, ae ua afea ma filifilia e ala i finagalo ma tofiga a le ekalesia aoao i le koneferenisi e pei ona usuia i Samoa.
O le susuga ia Logo Ofe, sa ia tauavea lea tofiga mo le lua tausaga talu ai, a o lei see ane lea tofiga maualuga o le ekalesia i le susuga ia Masunu.
Na amata i le sauniga lotu sa faia, i le malumalu i Falepapa sa taitai ai le susuga Rev Elia Suisala, o ia o le Failautusi o le Sinoti, ona sosoo ai lea ma le taumafataga tele e pei ona sa tapenaina. O le tuanai o le taumafataga, ona faatino loa lea o faaaloaloga e pei ona ta’ua i luga.
Sa molimauina le susuu’u ma le tofutofusia mai lava i tofiga aupito i luga o le Sinoti, e oo lava i Faifeau matutua, faasolo ane i Tamā ma Tina mālōlō manumalo, sa matuā tofu ma le sua ma teutusi ma faaaloaloga i taumafa ma faaoso.
O tofiga o le Sinoti ma ona tulaga aloaia e sefulu ma le lua mai lava i le Failautusi seia oo i le komiti tumau, sa tofu ma le faatamalii ma ona teuga ma teutusi. O manupapalagi ma pusa pisupo sa faaaogāina mo faaaloaloga. O susuga i Faifeau o le Matagaluega e to’a 25, sa tofu foi ma le sua faatamalii ma teutusi ma o latou teuga.
E toatolu tamā mālōlō, ae sefulu ma le fitu tina mālōlō, sa oo lava i ai faaaloaloga ma teuga e ala i sua faatamalii ma teuga eseese.
Ae mo le Sinoti, na afu i palapala malo ma le taumafataga e selau pusa pisupo, selau pusamoa. Sa molimauina foi le tetele o ie o le malo, i le toga paia i auafa ma tofa sa tatalaina, ona o pelega o le Sea ma lana galuega faapea lona tulai mai.
O meaalofa tupe sa tali ane ai le Sinoti ma tauaaoina e le Afioga i le Sea ma le Peresitene Auuso Fealofani teutusi, a o le Matagaluega sa tauaaoina le $2000. E 25 aulotu poo ekalesia o le Matagaluega i Niu Sila i Matu o le Ekalesia Metotisi, ma o le aofai foi ia o aulotu o loo i lalo o le taitaiga a le Afioga i le Sea ma lona faletua le susuga ia Rev Masunu ma Senerita Utumapu.
Sa auai foi nisi o Faifeau a le EFKS ma isi ekalesia i lea faamoemoe tele, ona o le tulaga i paolo ma gafa maualuluga, aemaise o aiga o le Afioga i le Sea ma lona faletua.
E tele nisi o fuafuaga lelei ma le tāua a le ekalesia ma le Sinoti a Niu Sila i Matu, auā le agai i le lumanai, o loo valoia e le toatele o tagata lotu ma tulaga tofi, e ono tulai mai ma faatinoina ona o le taitai fou e pei ona tulai mai.
O le saunoaga mulimuli a le Afioga i le Sea, na ia faailoa ai se tasi o suiga ua manatu i ai mo nisi o fuafuaga masani i totonu lava o le lotoifale o le Matagaluega.
O suiga e faavae i luga o le alofa faatamā, ma le tagai faataitai ma le manumanu i taimi ina ia faaaogā tatau nai lo le silasila ma pupū i taumafa o mea faaletino.
Sa faatāua i le finagalo o le Sea, le ao ina faaitiitia o taumafa ae ia mātau ma tulimatai le auga o fonotaga, ma ia faatāua le taimi o auauna ma taitai ma tagata lautele i mafutaga ma fono e fai.