“A outou taunuu i Kanana ia outou avea le Faafetai i le Atua”, o le upu lena a Mose i le fanauga a Isaraelu. A o le upu faamanuia a le tamā o Nafanua ina o le a alu e osi le toilalo, “A e pāia pa i Fulagaia sua le tuli, leaga e faigata alii o aiga”.
O le tina ia Mesepa Channing Selau, na faauuina mai le Iunivesite a Aukilani, ma lona faailoga Postgraduate Diploma Health Science and in Advance Nursing.
O se aso sa tatau ona tofo ai i na o lagona o le fiafia ma le faafetai ina ua iu manuia aso e tele sa feagai ai ma le taua o le mafaufau i aoaoga. Ae na filogia le fiafia o le tina ia Mesepa Channing, ina ua ufitia lona aiga i le ao pogisa ona o le amia o se tasi o le fanau i le aso o lona faauuga.
Peitai na ta‘ua e le tina, e ui i nei faanoanoaga, ae sa ia lagona pea le agaga faafetai i le Atua, ona o le umi ma le faigata na ia faafeagai ai ma ana aoaoga, ae sa ia mautinoa lava le pa‘i mai o aao fesoasoani o le Silisiliese ia te ia, i taimi uma sa tau lagona ai le iuleo o le fia ola, ma le fia maua o se mapusaga ona o tiga o lenei olaga.
“Sa lē mapu le faatauanau atu i le Atua, ina ia fesoasoani mai ona o le valea ma le vaivai i tauiviga ma le mafaufau.
Ae peitai, a oo loa ina malū le tai, ma solosolo lelei mea uma, ma a‘e malo se faiva ma ua tini taunuu se tauiviga sa tauasa mai ai ma loimata ma ni mafatiaga, o ituaso ia e maligi ai loimata o le fiafia ma le faagaeetia ona o le faamoemoe sa fauao faupo lea ua taunuu ma le manuia i le alofa o le Atua,” saunoa i ai Mesepa.
Sa momoli le faafetai faapitoa a le tina faau‘u, i nai ona mātua peleina ia Selau Loli ma Fogalele Loli, ona o le la galuega ua tino mai, i le la tapuaiga a o alo i lona faamoemoe, e ala ia la tatalo i le ao ma le po, sa lē tuuaunoaina lava o ia ma lana aoga. “ Faafetai mo oulua matuā peleina, talosia ia maua pea le lua soifua maua ina ia ou tausi ai pea i lenei olaga,” Mesepa.
Ta‘ua foi e Mesepa, e telē le galuega sa faatino e si ana fanau uma lava a o punouai o ia mo lana aoga, e pei ona latou tauaveina ai nisi o ona tiute ma galuega i le aiga.
O le mauaina e Mesepa o lenei faailoga, na ia ta‘ua e lē gata o se faamanuiaga mai le Atua mo ia, ae o lana luitau foi lea mo isi tina, e lē faapea a e grandma ona e lē toe mafai lea ona e ausia se sini maualuga o lou olaga.
“Omaia tatou o e Momoli laau i Fogaa” ona ua faamanuia le Atua mo tatou.
