A sousou le vasa o le ola nei ona o aafiaga i le maliu ma le oti faafuasei, ona maua lea i lagona tiga ma le mafatia matuitui, ae mautino lava o le Atua e maua ai le mapusaga o le Agaga.
Auā o lona mana e mafai ai ona musumusuina le mafaufau ma lagona, o lona alofa foi ia fai ma pale o le soifua e mautinoa e malie ai le galala o le faanoanoa ma le loto faavauvau, aemaise o lagona nutimomoia ona o mafutaga motusia faafuasei e aunoa ma se tapenaga.
Talofa e i le malaga na faamavae ai ma mātua, sa lilo i manatu o le a toe feiloai i se tulaga e pei ona ua oo nei i ai, ina ua toe foi atu i fanua ua feiloai ane ma loimata maligi ma le loto mafatia nutimomoia. 
O le malaga tafafao mai a le autalavou mai le afioaga o Magiagi na asiasi mai ai i laufanua o Aotearoa nei, sa latou faia ai se faatasiga ma le autalavou a Weymouth EFKS i Aukilani faapena foi ma le autalavou a Pitone EFKA i Ueligitone.
Na mae‘a nei faatasiga ma mafutaga faaleautalavou ona ta‘ape loa lea o le malaga mai Samoa i nai o latou aiga e malolo atu i ai auā aso na totoe o la latou faigamalaga e mafuta ai ma nai aiga.
Ae pagā lea auā ua moni ai lava upu masani, na momoe ma manū ae sau mala e atia‘e, e lē taupule foi se tasi ma le finagalo fai toatasi o le Atua auā na te fa‘i le moto fa‘i foi le matua.
O le Aso Lua 8/01/2013 i le aoauli, na faafuasei ai ona logoina mai matafale o le aulotu a Weymouth ina ua maua mai se tala na ufitia ai aiga uma o le afioaga o Magiagi aemaise o Ekalesia e lua sa mafuta i ai le aumalaga i le aopogisa, ina ua oo mai o se tala faanoanoa i se tasi o le aumalaga ua malaia a o iai i tafaoga ma malologa o le Tausaga Fou.
O le malologa a le aiga o le alii talavou o Campese Gino Capone Huch sa tolauapi ai i le nofoaga o le Treaty of Waitangi mo ni nai aso, na faafuasei ai ona tupu se faalavelave ina ua malemo le atalii ma maliu ai lava i totonu o se vai e molimauina ua toatele lava foi tagata e afaina ma maliliu ai.
O le Aso Lua la e faapea o le aso mulimuli lea o le latou tolauapiga peitai na tuua ai loa lea nofoaga ma le loimata maligi, lagona nutimomoia ma le loto faavauvau ona o le mea na tupu.
E puupuu le taimi na faia ai le mafutaga a autalavou nei, ae o molimau ola a tagata o aulotu nei sa faamautu mai i ai le faigamalaga, o se taulealea mataala, e laufofoga fiafia, e faamasani gofie ma isi tagata na te lē faatuaoiina foi poo ai, toe fiafia lava e talatalanoa ma faasoa, e atamai tele lona fofoga ma lona silafia i lona tulaga faatamaititi ma le faataulealea foi.
O se alii e fiafia tele e soifua mo Iesu e ala i lona faamaoni i le faatinoina o soo se faamoemoe faaleautalavou aemaise o vaega uma e auai ai i totonu o le aulotu.
I le po la o le sauniga faapitoa na faia i le Malumalu o le Ekalesia EFKS i Weymouth, sa matuā faatumulia le malumalu i le taupati ane o aiga uma, o uo ma aumea mamae aemaise lava o tagatānuu o le afioaga o Maagiagi i lo latou fia molimauina ma faaoo atu le lagolago ma le agaga alofa i mātua o le atalii ua faafuasei ona motusia le mafutaga ona o faalavelave faafuasei.
