Ole umukuka lenei oloo faaaogāina e le aiga ole tamaitai o Iva Fouvaa 42 tausaga le matua e momoe ai i aso uma ile afioaga o Tanumapua. Ole aiga lenei e toafā e aofia ai ma se pepe faatoa tasi le tausaga ma le masina e tasi. Na nonofo muamua ile latou faleoo peitai ole masina o Novema ole tausaga na tea nei na faatama’ia uma ai e le afi le faleoo ma faaleagaina uma ai a latou meatotino e pei o lavalava, ulo ma ipu faimeaai e oo lava i tusi aogā ma tusifolau na alu uma ai.
Ta’ua e Iva, o lo latou faleoo e masalomia na susunu e le tagata ma e oo mai ile taimi nei e lei maua lava poo ai na faia lea gaioiga a’o le ā foi le pogai na susunu ai, ole mafuaaga tonu lea na faasee ane ai ma faaaogā loa le latou umukuka e mapu iai e oo mai lava ile taimi lenei. Na agai foi ile vaega ole koluse mumu mo se fesoasoani ini lavalava ma ni ipu e aai ai ile taimi na uma ai ona mu le latou fale, toe agai foi ile koluse mumu mo se fesoasoani ini tapoleni ile maea ai ole afā o Gita peitai e oo mai ile taimi nei e lei maua lava se fesoasoani. Na tali atu le Koluse Mumu e uma alu atu le asiasiga peitai e lei oo atu lava nisi.
O Iva ma le latou aiga oloo nonofo ai ma galulue ile fanua o Faumuina i Lepea, ma tautua ai ile afioaga o Lepea, e na’o le $30 tala le tupe e totogi ile vaiaso faatasi ai ma le tautua i mea fai ale afioaga. Na ia faafetaia lea laueleele ua o latou faaaogāina e galulue ai i aso uma. Ole tupe maua a lea aiga e faalagolago lea ile faatauina o meaai vela e pei o faalifu talo, faalifu fa’i ma nisi o taumafa i luma ole faleoloa o Farmer Joe i Ululoloa i aso uma, lea e maua ai se vaega tupe e tausi ai le aiga ma tautua ai le nuu. E faatolu ona ave le latou faleaiga ile vaiaso, e leai se isi o i latou e faigaluega ae na’o le pau lea ole galuega e faatino i vaiaso uma, ole faleaiga o mea’ai taumafa vela.
Pau vaega lelei ole nofoaga lenei ua oo iai le suavai ma le eletise, peitai ole tele o vaega tāua na faaleagaina ina ua mu le latou fale e aofia ai foi telefoni feaveai ma isi pepa aogā lea oloo mafatia ai lenei aiga. Saunoa Iva, o lea lava e faaputuputu seleni e maua mai ile latou maketi o taumafa vela e faatau ai nisi apa e ato ai le latou faleoo. Ile taimi lenei e na’o le tolu lava apa oloo iai, ma e lē taitai ona malu ai se faleoo. E ese foi lea ituaiga o soifuaga o ola ai lenei aiga pe a fua atu ile tele o aiga ole atunuu o nonofo ai i fale lelei ma nofoaga lelei, ae na ta’ua e Iva, a oo ina momoe ile po, pau lava le mea ia maua se vaega e taoto ai le papatua ona ole laititi ole avanoa ole umukuka oloo nonofo ai nei.
Oloo taumafai lea tamaitai e fesootai i nisi o lona aiga o aumau ai i atunuu e mamao ina ia maua ai se fesoasoani mo ni vaega e fausia ai so latou fale lelei. O Iva e sau mai le afioaga o Fagalii ma ua maliliu uma nai ona tuaa, ole taimi lenei ua alu lava le tagata latou ia e saili sona lumanai manuia.
Ma ole taimi mulimuli lava na faatasi ai le latou aiga, ole maliu o lona tina ile tausaga e 2015. Oloo talotalo Iva Fouvaa ina ia vave maua se fesoasoani mo ia ma lona aiga auā ua na’o se aiga teine e leai se alii.
