“E sili atu le manu‘a o le loto o le tagata i le manu‘a o lona tino”. O le saunoaga lea a le susuga Pagamalie Penani Lemuelu na ia faamatala ai lona tiga faatasi ai ma lona faletua i mea na aliali mai i lo latou va ma le faifeau o le latou aulotu a o iai i Sini Ausetalia i le masina na tea nei o Setema, i se faamoemoe o se sailiga tupe mo le fausia o le malumalu o le aulotu.
Sa malaga ai Pagamalie ma lona tausi o Tusi i le suegatupe ona o lona toalua o le teutupe a le ekalesia. Sa sologa lelei mea uma o tapenaga o le faamoemoe a o lei tuua Samoa e pei ona faamatala le tulafale seia oo ina taunuu i Ausetalia. Peitai e lei tuanai nai aso ma savali i le vaiaso talu ona to‘ai taunuu le aumalaga, ae aliali mai loa ni faafitauli ua mafua ai ona tiga Pagamalie ma lona tausi o le teutupe a le ekalesia, e pei ona mafua ai ona ia tusi atu i le susuga i le Toeaina Faatonu a le Pulega ma faailoa iai ona lagona faasaga i le faifeau ma lona faletua.
Gaoia le $10,000 o tupe na maua
O le tusigaigoa ma le siva sa faia o le sailigatupe na maua ai le seleni e silia i le lima sefulu afe Ausetalia, e pei ona faailoa mai e le teutupe le tina o Tusi, o le tausi lea o Pagamalie. O lana faamatalaga e leai se mafutaga a le aulotu i Sini ona o se ekalesia e ausage ma e toagaogao foi ma e lē o se aulotu e i totonu o se faiganuu e maopoopo ai ni tulaga faapea e pei o isi aulotu e iai mafutaga a alo ma fanau i atunuu i fafo.
O tau aiga o le fafeagaiga ma lona faletua, faapea le aumalaga ma nisi o le aulotu faaopoopo i ai ma uo ma ē masani na alolofa ane i le faamoemoe, ma maua ai le seleni na tuufaatasia ma tuuina atu i le faafeagaiga.
Peitai na faaalia e le teutupe o le aso na o ai e saili se faletupe poo se pisinisi lafo tupe faamomoli e lafo ai le seleni i Samoa, na talanoa atu ai le faafeagaiga e toe siaki le seleni ma toe faitau. O le toe siakiina lea na iloa ai ua toesea le isi fusi tupe pepa e sefulu afe e pei ona faamatala le teutupe.
“O a‘u lava na faitauina ma isi sa iai le seleni ma ou tago fai fusi tupe (bundle) ta‘i sefulu afe e tolu ae ese ai siaki (cheques) sa tuu i le faifeau, ma sa atoa lelei,” o le faamatalaga lea a le teutupe, ma ia faapea mai na faateia ina ua toe saunoa atu le faifeau e toe faitau ma siaki le tupe, ma ia finau atu ai, pe aisea o le a toe faia ai lea tulaga sa lelei mea uma i le taimi na faamaopoopo ai le seleni ma tuuina atu ia te ia (le faafeagaiga).
O le toe faitauga lea na iloa ai ua misi le isi fusi tupe e sefulu afe, ma sa faamatala le teutupe na oso ai lona lē fiafia ona ua atagia mai i lana matau o ia lea ua tuua‘ia i le leiloa o se vaega o le seleni. Fai mai Tusi na ia faailoa lava i luma o le aumalaga ma le faifeau ma lona faletua na te lei avea se tupe, ae e tatau ona sailiili lelei poo ai tonu ua na tagofia le sefulu afe. O le tusi a Pagamalie i le Toeaina Faatonu ua faamatala uma ai le atoaga o le mataupu ma le la faaiuga ua faia ina ua foi mai le malaga i Samoa, e lē toe lolotu ona ua matuia tele le tuua‘iga faatasi ai ma lo la lē fiafia i nisi o uiga faaalia o le faafeagaiga.
O le tusi foi lea o loo faamatala ai e lea tamalii se latou feiloaiga ma le faifeau ma lona faletua i le Aso Tofi, 10 o Oketopa 2013, ina ua foi i Samoa, lea o loo faailoa ai e Pagamalie na oo atu le faifeau ma le faletua e avatu le la tuualalo e tusa ma mea na tulai mai i le latou malaga. Peitai na faailoa i ai e le tamalii o laua e lē toe suia le la faaiuga. Na aliali mai ai ma nisi tulaga i lea feiloaiga e pei ona faaalia e Pagamalie i lana tusi i le Toeaina Faatonu, na toe tuua‘ia ai foi laua ma lona toalua e le faifeau ma lona faletua o ni tagata gaoi.
Leai se finagalo o le faifeau i le mataupu
Na manuia sailiga mo le fia maua o le faafeagaiga i sona finagalo i le mataupu. O le Aso Gafua, 14 o Oketopa na afea ai le maota o le ekalesia o loo faamautu ai lana susuga ma le faletua ma le nofo a alo. Na fesiligia ai loa e tusa o le mataupu ua faaalia i le tusi a le susuga Pagamalie Penani ma lona tausi, ua ave i le Toeaina Faatonu o loo ta‘ua ai tulaga o le latou malaga suetupe ma lo la lē fiafia.
Peitai sa faafetai mai le faafeagaiga le susuga Apisaloma Taeleipu ma lona faletua i le oo atu ma faailoa atu le tulaga ua oo i ai le lē fiafia o se tasi sa auauna ma lolotu ai i le ekalesia o loo la tausia, ae sa faailoa mai e le faifeau e lē fia faaalia sona manatu. “Tuu i le Atua o loo ia silafia le mea moni”, o ana upu ia.
