O le faamanatuina o le 53 tausaga o Samoa i Kuiniselani lea sa gapatia ma olooloia ai le Mafutaga Soofaatasi a Ekalesia sa faatinoina le tapenaina o le Tutoatasi o lenei tausaga, na iu manuia ma tau lau o le faamoemoe. Ua mae‘a paelago mea uma i le alofa ma le agalelei mai o le Atua.
O le po o le Aso Sa, aso 7 Iuni 2015, sa tatalaina i le sauniga lotu sa taitaia lava e le afioga ia Patele Epati Tamati ma viiga o le Atua sa lagiina lava e ekalesia taitasi.
O le taeao o le Aso Gafua na sosoo ai, na faataunuu ai le tele o savali faaaloalo a ekalesia, mafutaga, faalapotopotoga ma asosi o tama ma teine tuai o nisi o aoga i Samoa. O le taulaga siitia sa molia e lana auauna ia Ps Leivi Mulitau‘aupele ma nisi auauna sa lagolagosua.
Na faagasolo le tele o polokalame ma tatalaina faafiafiaga i le saasaaga faasamoa a le Miss Samoa Ausetalia ma le tele o vaega uma sa fai sao ai le mamalu o le atunuu.
Sa fai sao le Matagaluega EFKS, Ekalesia Full Gospel i le tele o ausiva, faafiafiaga ma le pese faaleagaga sa saunia e le Puleaga Katoliko.
E momoli le agaga faafetai tele i le mafutaga Soofaatasi a Ekalesia, i le matagofie o vaega uma o le faamoemoe, logomalie lauga aemaise le sao o le Fofoga o le aso, le failautusi susuga ia Faamatuainu Ili Taualai. E leai se vevesi na to‘a mea uma ona o le maopoopo o lona tapenaina.
Malo le tapena, malo le galulue, i lau afioga i le Taitaifono Rev Lauie Lupematasila, faapea le Failatusi – Faamatuainu Ili Taualai, le Teuoloa aemaise Ekalesia uma o loo i totonu o le Mafutaga Soofaatasi. A mae‘a se galuega e foi ai pea le viiga o le Atua.
O le agaga faafetai ma le faamalo e faaleo atu ile Mafutaga Soofaatasi a Ekalesia ona o le avanoa faaauro na tuuina mai e faasalalauina ai i luga o le ea mai le po o le Aso Sa ma le Aso Gafua e le Penina o Asuisui.
Faafetai mo le faaaloalo o le a lē galo lenei uluai taimi sa o matou maua, ae o le viiga ma le faafetai i le Atua ona o avanoa lē aumaua.
E talitonu o le agaga foi lea o le Mafuaga Soofaatasi a Ekalesia e momoli lo latou agaga faafetai ia i latou uma sa fai sao i lea aso i le faamanatuina o Samoa i Kuiniselani aemaise le fia afe o tagata sa maua lea avanoa e feofoofotai ai le alofa ma talatalanoa i lea aso taupoina.
O lea foi aso atofaina sa faia ai le laugatogi a Tama Tuai o le Malisi (Marist Old Boys Association QLD) i le latou taamilosaga lakapi pa‘i lea sa tauaaoina faaailoga e le afioga i le Hai Komesina o Samoa i Ausetalia, le tofa ia Fata Brian Kaio. Toatele malo faaaloalogia sa auai mai na mamalu ai ma paia le aso.
E lē gata i lea o le se‘iina o le taavale a le kamupani faatau taavale a le Autozone lea sa manumalo ai Matauaina Asiata ma nisi faailoga faapitoa, o le Auto zone foi sa lagolagoina faasalauga i le Sisigafu‘a i luga o le Penina o Asuisui, faapea le Kamupani telefoni a le Digicel ma le JD Financial Services.
O le Taitaifono o le Mafutaga Soofaatasi a Ekalesia o le susuga i le Toeaina ia Rev Lauie Lupematasila ae o le failautusi o le susuga ia Faamatuainu Ili Taualai faapea le Komiti.
