Ua mae‘a le palota a le atunuu ma o loo folofolo malie faigata sa feagai ma nisi o sui sa fia tauva, faapea sui ua lē manuia auā ua tele tupe ma le taimi sa tapena ai, ae ua ese le taunuuga o le faamoemoe sa talitonu o le a pale i le tofi o le itumalo.
E lei manuia le finauga i le faamasinoga a le afioga i le Faasisina, Leota Leuluaialii Ituau Ale, i lona naunau e tauva i le faiga palota ua mae‘a a le atunuu ona ua lē faamalieina lona tulaga agavaa, i le leai o se monotaga.
Ua faailoa mai nei i le faaiuga tusitusia a le Faamasino Sili le finauga a le itu tetee e faasino i le Pulenuu o Solosolo, na mafua ai ona ia lē sainia le pepa o le faamaoniga o le agavaa o Leota i le faia o lana monotaga i totonu o le afioaga.
E toalima na molimau e lagolagoina le talosaga a le Faasisina ae toatolu na molimau tetee e aofia ai le Pulenuu o Segaula Lo‘u Ta‘aga.
O le faafeagaiga o le ekalesia Assembly of God i Solosolo o Penitala Uelese na ia ta‘ua i lana molimau tusitusia e faapea, e iai le matafale o Leota i lana aulotu ma o se matai e faamaopoopo i pulega a alii ma faipule ma e tele foi atiina‘e e taulamua ma lotolotoi ai mo le manuia o le afioaga.
O matai e toatolu o Solosolo o Talamau Avalogo Ieli, Pulemagafa Kimi ma Lemaituuga Tilo Leota, sa latou faaalia o le afioga i le Faasisina o se matai fai monotaga o le afioaga ma o lona soifuaga atoa i le nuu e faatino ai lana tautua.
Peitai i molimau a isi matai e toatolu e aofia ai le Pulenuu o Sega‘ula Lo‘u, Leau Savaiinaea Vaasa ma Talatu Mose, na faaalia ai o soo se matai o Solosolo e fai monotaga e faamaopoopo i soo se fuafuaga ma galuega ma atiina‘e.
O le tausaga e 2005 i se tasi o fono a le afioaga na faailoa ai e Leota Leuluaialii Ituau lona alu ese ma le faiganuu, lea na ia faavae ai se faiganuu fou e ta‘ua o Solosolo-uta.
Na faaalia foi e ia matai o le tele o taimi e lē vaaia ai le Faasisina i totonu o le nuu auā e tele ina faamautu i Tanumalala, ma o se tagata foi e malaga i le tele o taimi ma aumau i Niu Sila.
O le tausaga e 2009 na faatea ai Leota e alii ma faipule, peitai e lei mafai ona faamaonia e le faamasinoga o fanua ma suafa lea faaiuga. Sa faatonuina ai Leota e le faamasinoga e foi i le nuu tele ma ia teuteu le mataupu.
Sa faatonuina foi ina ia soloia ma faamuta loa lana faiganuu.
Faaalia e le Pulenuu i lana molimau tusitusia ua faailoa e le faamasinoga, e lei tapaina o ia e Leota mo le sainia o lana pepa e faamaonia ai sa nofo i le nuu i totonu o le tolu tausaga. Pe ana oo atu ia te ia, o lona uiga na te lē sainia ona e iai lona talitonuga e lei atoa le 3 tausaga na nofo ai o ia i Solosolo.
Ua faailoa ai foi e le pulenuu le sāvali a le afioaga na alu i le Komesina o Leoleo mo le fia faia o se tagi i le lē usitaia e Leota o le faaiuga a le faamasinoga o fanua ma suafa.
Na ave le mataupu i le faamasinoga ma molia ai Leota i le lē usitai i le faamasinoga, lea na faamaonia ma faasala tupe ai.
O vaega uma nei na silasila i ai le Faamasinoga Maualuga ma faavae ai lana faaiuga e lē agavaa le Faasisina e tauva i le palota ona e lē o faia sana monotaga e pei ona aiaia i le tulafono o faiga palota. Ua teena e le famasinoga le finauga a le itu tagi, ua na o le Komesina o Faiga Palota e agavaa i lalo o le tulafono na te sainia pepa o agavaa o sui tauva.
