Taneavea ma lau tofa i le igoa matua faapea le mamalu i le Aiga Sa Taele‘ava – ua gau le poutu a lo outou aiga – ua tuua le malo i le afioga i le Gafatasi, le afioga ia Fuimaono Moasope McCarthy. Ua gasolosolo ai ao o le lagi ma taape papa ia Sa Fenunuuivao ma Sa Tupua.
Ua lagia ai Salani ma Olosefula, Tuani ma Pitovaoaiga, tainane Lotomua ma Fogavai, o maota e afifio ai le afioga i le Gafatasi faapea le Sa‘oao ma le Matuaalii, Tupua ma le Aumaga o Atua ma Aana. O se lagi foi lea e faasino i le paia o Alaalagafa ma le latou tama, faapea Tauagaeseese ma upu ia te oe Falealili.
Ona ou manatu lea, ona ua tele tausaga o afio le afioga ia Fuimaono i le itumalo o Magele ma tautua ai i lana Ekalesia, le Ekalesia o Iesu Keriso o le Au Paia o Aso e Gata Ai, ma o le itumalo foi lea o loo lagomau ai Fuimaono i lona nofoaga tumau ma lona oliolisaga e faavavau.
Avea ia lenei avanoa e fai ai a‘u ma sui o Magele e momoli atu ai le faamafanafanaga i le aiga faanoanoa, faatasi ma sa‘u upu faafetai e tusa o le soifuaga tautua o le afioga i le Gafatasi.
O sa‘u upu faafetai mo le soifuaga tautua o le afioga ia Fuimaono Moasope McCarthy e maua mai i molimau matagofie a le aiga faapea foi se molimau mai le afioga Faolotoi Reupena Pogi, le afioga i le Konesula Aoao o le Malo Samoa i Aukilani. Ou te matuā faafetai ona o le soifuaga tautua a lenei tamā iloga o le Atunuu. O loo faamau lelei i talafaasolopito o Samoa le avea o ia ma Suetusi, Faiaoga, Faipule, Minisita o le Kapeneta, ma Sui Palemia o le Malo i le va o tausaga o le 1964-1975.
O ia lea o se tasi o poutu sa tau amataina mai le faavaeina o faigamalo tutoatasi o Samoa ma faigamalo temokarasi lea ua tatou aeae ai nei.
E lē gata i lea, a o afio foi i Niu Sila Fuimaono, sa avea foi o ia ma Justice of the Peace (JP), na maua lana faailoga o le BA mai le iunivesite, avea ma sui o le Australia New Zealand Institute of Management (ANZIM), avea foi ma Certified Public Accountant (CPA) ma faavae ana pisinisi.
O nei faailoga maualuluga e foliga mai e mafua ona o lana luitau lea i lana fanau, ia latou saili ia maua le poto ma le atamai. Fai mai le molimau a nisi o lana fanau, e unai lava latou e le latou tamā ina ia faitau tusi ma toaga i le aoga.
E 20 le fanau a le afioga i le Gafatasi, 80 le aofai o fanau o lana fanau, faapea ma le toatele o isi tupulaga e sosoo ai.
Ou te matuā faafetai ua avea le soifuaga tautua o Fuimaono Moasope McCarthy i lona Atunuu e fai ma taiala lelei e lē gata mo ona alo, ae ua avea foi ma faataitaiga lelei i soo se augatupulaga, i soo se ituaiga tagata – matua pe laitiiti. O le molimau o le soifua tautua o Fuimaono – e tāua le saili o le poto ma le atamai. E tāua le unai o alo ma fanau ia toaaga i le aoga. E tāua le unai o alo ma fanau ia saili faailoga maualuluga mai iunivesite o le lalolagi.
Fai mai le tasi o molimau i le sauniga faaleaiga – sa unai lava ia e lona tamā ia faitau tusi – ae o ia sa lē fiafia i ai. O lea la ua matua, e leai sona faailoga mai le iunivesite e pei o lona tamā, ae o loo avea o ia ma tagata faufale.
O lona uiga o lenei molimau – afai lava e malosi le finau o mātua e unai le fanau i le aoga – atonu e lē maua uma ni faailoga maualuluga – ae e faamanuiaina lava le fanau e pei ona maua le tomai faapitoa faufale a lē sa molimau.
O le mataupu lenei tau a‘oa‘oga, o le mataupu lea ou te talitonu e pito i sili ona tāua mo le sailiga o le lumanai manuia o o tatou aiga i Niu Sila.
I le vaiaso ua tea i fonotaga a le Palemene i Ueligitone, sa faapea mai le Malo a le National ua fuafuaina e $55 miliona ua faaagaga e fesoasoani mo tupulaga talavou, ma e 3 polokalame o le a faatupeina, o le ‘Limited Services Volunteers’, ‘Skills for Growth’ ma le ‘Job Ops with Training’.
O lenei tupe o le a faasafua mo nei polokalame i le 4 tausaga o i luma. O le autū – ia maua e tupulaga talavou avanoa e faigaluega ai ma maua ni a‘oa‘oga mo le faalauaiteleina o le iloa e faatino ai galuega o loo manaomia ai le tomai faapitoa.
O la‘u faitioga i le Malo, e lē o tāua lava tupulaga talavou o le Pasefika, na o Maori. E lē gata i lea, o lenei $55 miliona e mo le 4 tausaga, o lona uiga e na o le $13.75 miliona i le tausaga.
E ui e foliga telē lenei vaega tupe, ae a fuafua i le 27% o tupulaga talavou e leai ni galuega o faigaluega ai, ma afai e faatusatusa i le maualuga o le 14% o tupulaga Pasefika e leai ni galuega o faigaluega ai, ou te talitonu e na o le 4,000 tupulaga o le a mafai ona aogā i ai polokalame a le Malo, ona tatou fesili lea, ae faapefea le isi toatele o tupulaga talavou?
Ou te matuā faitioina foi le faigamalo ona ua faatapulaia le fuainumera o tamaiti e mafai ona aooga i iunivesite. Ua taofi foi vaega tupe sa masani ona fesoasoani ai i ia aoga maualuluga ma taofi foi sikolasipi sa masani ona maua e tupulaga Pasefika.
O soo se faiga faavae a le Malo e taofiofi ai le faatupeina o avanoa e unai ai tupulaga talavou o le Pasefika e agai i aoga, aemaise aoga maualuluga – o inā e iloa ai le vaavaa o le faigamalo.
O le maua o le poto ma le atamai e fanau ma tupulaga talavou, o le taiala tonu lea o loo molimau mai i le soifuaga tautua a le afioga ia Fuimaono Moasope McCarthy – e manuia ai aiga ma le Atunuu.
