O loimata maligi o le faanoanoa ma le loto tiga aemaise o lagona o le misia o sē e pele i le loto ma le agaga, e lē mafai ona faamatala ma faauiga iai loimata sisina o le paaga a le alii Saina o Charles Cao, lea na maua lona tino maliu i luga o le taligalu i tua o le fale o le malo i Apia.
O Charles Cao e lē o se tamai tagata. E fua lea e ese lana paaga tamaitai Samoa i Samoa nei, lea na fai a la fuafuaga e faaipoipo ma nonofo i Samoa ma fai se la pisinisi, ese si ana faapolopolo Saina, lea sa auai i le aso na uluai valaau ai le mataupu o le alii ua tuua’ia i le maliu ai o le alii o Charles.
E lata i le 30 le aofai o alii ma tamaitai Saina o loo fai a latou pisinisi i Samoa nei, na auai i le aso na valaau ai le mataupu, ma o le tamaitai Saina e faapea o ia o le toalua faaipoipo o lē ua maliu i Saina, na molimauina lona tagi, ma uu mau le ata ua uma ona faalapo’a o Charles, ma faapipii agai i lona fatafata.
O taimi ua sii i luga le ata o Charles e foliga mai e faaaliali atu i le Faamasino Sili, ma tagata uma lona loto tiga seia oo ina fautuaina e leoleo, e lē faatagaina ona ia faia lea tulaga i totonu o le potu faamasino.
E tolu nuu o loo ta’ua e lē ua molia i le fasiotia o Charles, e sau ai.
O le afioaga o Salelavalu Savaii, Gataivai i Savaii lava, ma le afioaga o Vaitele Fou.
A fua atu la i le mamao o nuu e sau ai le alii o Tauinaola Laupua, ona faapea ane lea matuā mamao le mea e tafao mai ai lea alii ma le oo i le taligalu i Apia lea ua tuua’ia i le maliu o le alii Saina.
I le aso na valaau ai le mataupu i luma o le Faamasino Sili o Patu Tiavaasue Falefatu Sapolu, na leotele le talosagaina e Tauinaola o sana loia e tulai mo ia mo lana mataupu. E lei tuuina atu foi sana faamatalaga aloaia pe ioe pe tetee i moliaga faasaga ia te ia.
Na talia e le Faamasino Sili ma le faatonuga e tatau ona toe tulai i le vaiaso lenei ma ia oo atu iai ua maua sana loia.
Na faatonu foi e le faamasinoga ia faafesootai le lesitala e talosagaina se loia e totogi e le malo e tulai mo ia.
O se atalii e talavou, e lē o se tagata maualuga, e lē lapoa foi, ae o le faafugaina o lona ulu e maitauina ai foi lona ituaiga o tagata.
O loo taofia pea lea alii i lalo o le vaaiga a leoleo ona o le ogaoga o le moliaga faasaga ia te ia.
E ui ina e lei auai le paaga Samoa a lē ua maliu, le tamaitai o Shine i le aso o le faamasinoga, ae e lē galo ia te ia le vaaiga na ia maua atu ai lana foi paaga i le po na maliu ai.
“Ou te taunuu atu, e saofai lava i luga o maa o le taligalu, pei na faasaofai ai, faalagolago i luga o le ‘alā ae ua gau i tua lona ulu, ae ua leiloa ona foliga i le palapala, ma ua fulafula ona mata, oka se faigata o lo’u vaai atu ua oti.
E tagi tagi lava le tamaitai ma tau lana fasa, i ona lagona tiga o feagai ai nei ma ia, “oi e leai ou te lē faamagaloa tagata nei na fasiotia si o’u toalua.”
Mulimuli ane i le aso o le faamasinoga, lea faatoa faamaonia ai le mafai ona ave i tua le tino maliu o Mr Cao mai le falemaliu o le falemai mo le faaliu efuefuina lea i Tafaigata. O le isi tulaga na molimauina ai le loto tiga tele o le manamea Samoa a le alii Saina ua maliu, ona na ia ta’ua e lei logoina atu o ia e le ofisa o le Amepasa a Saina i Samoa, e faatatau i le aveina i tua o lona toalua ma le falemaliu, ma fuafuaga o le faaliuefuefu o lona tino.
Ae se meamanu le tagata na iloa lea fuafuaga na vili atu ia te ia na ia iloa ai. Sa lei finagalo le tamaitai Samoa e toe faia nisi tala poo ni faamatalaga i le tiga ua toe faaopoopo i ona luga.
Aemaise o loo iai le la tama e lei atoa se tausaga, lea o le a gafa nei ma ia le tausiga.
I le taimi o le talanoaga a le tusitala ma le manamea Samoa a Cao, e lei maua lava se latou fesootaiga ma le aiga o le alii Saina lea na malaga mai, ae o le tino o lona toalua, “pau lea o loo silasila le Atua i la’u galuega alofa sa fai i le latou tagata.”
