O le faomea ua avea nei ma se tasi o solitulafono ua faapea mai le Faamasino Sili le afioga Patu Tiavaasu‘e Falefatu Sapolu, o se solitulafono ua matuā taatele. O le solitulafono lea ua molia faatasi ai se ulugalii o loo nonofo faapouliuli o Feti Niko mai Taufusi o le tamaloa lea, ma lona toalua o Faigame Ema Sulutia Saolotoga o Taufusi ma Magiagi.
O le vaiaso nei na faasalaina ai le tamaloa o Feti i le nofosala i le falepuipui mo le umi e tausaga ma le ono masina ina ua faamaonia moliaga e lua o le faomea. O moliaga foi ia o loo molia ai lona toalua, peitai o loo faatali nei se faaiuga mo le fafine o Faigame Ema, ae ua muamua lau le iuga o le tamaloa.
E faato‘ā 20 tausaga o Feti ma o le faaiuga ua faia ia te ia o le a lē aafia ai taualumaga a le faamasinoga faasaga i lona toalua.
E toalua nisi na aafia i le solitulafono e pei ona faaalia e le faamasinoga, o se tamaitai e 16 tausaga le matua ma se tamaitai ua matua atu e 29 tausaga.
O le po o le Aso Lua 21 o Fepuari 2012 pe tusa o le ‘afa o le tasi i le vaveao sa faatali ai se taavale laitiiti poo se taxi a i laua na aafia. Faaalia e leoleo o luma o le maota Samoa o loo iai se tasi o ofisa o le pulega o tagata tafafao sa faatali ai se taxi a ia tamaitai e toalua.
Fai mai a o faatali se taxi na feosofi ane lē ua molia ma nisi tagata se toatolu mai se pa laau o loo i lea vaega o le taulaga ma faaoolima loa i le tamaitai 16 ma le 29 tausaga le matutua.
Na taumafai le tamaitai matua e alu ese ae na aapa atu lē ua molia ma fao mai lana telefoni feaveai poo se cellphone. Na auai foi lē ua molia faatasi ma isi i le faaoolima na faia i le tamaitai laitiiti 16 tausaga le matua. Na tu‘i e lē ua molia foliga o le teineitiiti ona ia fao lea o lana telefoni feaveai ma sola ese loa.
O le lipoti sa tuuina atu i le faamasinoga e lei faailoaina ai pe fia le tau o telefoni e lua na ave e lē ua molia, ae i le lipoti i mafatiaga o i laua na aafia na ta‘ua ai e le tamaitai laitiiti o lana telefoni e $35 tala, ae o le tamaitai matua na ia ta‘ua o lana telefoni o se ituaiga o le Samsung Touch Screen. Na afaina le tamaitai laitiiti i ni manu‘aga e pei o le uliuli o se tasi o ona mata, ma le tiga o ni vaega o lona tino. O le tamaitai matua sa mafai ona tali atu i le osofaiga a lē ua molia ma sa mafai ai foi ona sola ese ma saili se fesoasoani.
O faamaumauga a leoleo ua iloa ai sa iai ni moliaga o le faamisa ma le lē faamaoni sa molia muamua ai Feti Niko i le tausaga e 2003 a o faato‘ā 12 ona tausaga.
E ui ina faapea mai le tamaitai laitiiti o lana telefoni e $35 tala, ae e iai le talitonuga o le faamasinoga o le telefoni a le tamaitai matua e fai lava si taugata pe a fua i le ituaiga o le Samsung Touch Screen. Ua silasila le faamasinoga i le matuia o manu‘a o le tamaitai laitiiti ma o le fua foi lea o le faasalaga.
O le moliaga o le faomea e sefulu tausaga le maualuga o le faasalaga faafalepuipui, peitai o le silasila a le faamasinoga e amata lana faasalaga mo Feti i le 3 tausaga. Ua toese le isi tausaga ona o le ioeina vave e lē ua molia o le moliaga, ae peitai ua faaopoopo le isi ono masina ona o moliaga sa molia muamua ai ma tulai mai ai le faasalaga faafalepuipui e 2 tausaga ma le ono masina.
