Ua mae‘a suesuega i le uma ai o le ola o se teineititi aoga e 8 tausaga le matua, lea na lipotia le sasa e lona faiaoga.
O le taunuuga o suesuega a leoleo ua molia ai le tamaitai faiaoga o Telesia Funa‘i o Nuusuatia i Safata i le faaoolima, ma o loo faatali le aso e tulai ai i le faamasinoga i le lipoti a le fomai, o le a faia le taotoga faapitoa e sailia ai le mafuaaga o le maliu.
Ua faailoa e le komesina lagolago o leoleo le afioga Leaupepe Fatu Pula, o se vase na faaaogā e lē ua molia e sasa ai le teineitiiti ua fano le soifua, le mafuaaga o le totolia o ni vaega o ona vae.
Ua faaalia e le aiga o le teineititi na aafia, sa alu atu le tamaitai faiaoga ma faia se faatoesega ina ua logotala le aiga i le afaina o le tino o le teineitiiti a o lei uma lona ola.
O le tasi lenei o mataupu e fesootai ma le sasa o fanau aoga ua fesiligia ai pea e le toatele le tulafono a le matagaluega o aoga o loo tapu ai ona sasa fanau i le taimi o iai i potu aoga.
O le tulafono lenei ua mae‘a ona faalauiloa e le matagaluega i ni tausaga ua mavae atu ina ua aliali mai foi ni mataupu e aafia ai faiaoga i le sasa o tamaiti.
O le uma ai o le ola o le teineitiiti valu tausaga ua faaalia e lona tamā i luga o nisi o auala o faasalalauga, o lona afafine na maliu i le leukemia poo le gasegase o le kanesa ua aafia ai le toto.
