O se toe tepa lea i le faafotu tupu o le suafa Malietoa na faia i Malie a’o faatino e matai o le afioaga

O se toe tepa lea i le faafotu tupu o le suafa Malietoa na faia i Malie a’o faatino e matai o le afioaga

O le vaiaso fou i le aso 2 o Oketopa 2018 e tutulai ai i le Faamasinoga faaitumalo i Mulinuu, matai e silia i le 20 ua molia e leoleo i le a’itui poo le lē usitaia o le poloaiga le tumau a le faamasinoga i se tusi mai le Pelesetene le afioga i le Faamasino sili Patu Tiava’asu’e Falefatu Sapolu.

O le poloaiga le tumau na ave sa’o i matai o Malie e aofia ai ma le afioga Faamausili Moli na faae’e iai le suafa tupu o le Malietoa, ina ia taofia le faia o le faafotu tupu se’i laolao muamua nisi o faalavelave ua faatoai i foga a le Malo. O le aso iva o le masina nei o Oketopa e suesueina ai le talosaga apili a nisi o suli o Talavou, ma suli o Moli, i le faai’uga a le faamasinoga o fanua ma suafa na fofogaina ia Tesema o le tausaga ua mavae na tofia ai Faamausili Moli e nofo i le suafa Malietoa e tausia le aiga.

O nisi o matai o le afioaga o Malie i le aso o le faafotu tupu

O nisi o matai o le afioaga o Malie i le aso o le faafotu tupu

E tusa o molimau na mafai ona maua i sailiiliga a’o lei faia le faafotu tupu, o le Aso Tofi a’o lumanai le saofai i le Aso Faraile na faia ai le feiloaiga a suli e toatolu i luma o le faamasinoga i le faia o se soalaupulega e tusa ma faalavelave faasaga i le faataunuuina o le faafotu tupu. Sa iai le finagalo o nisi o suli e faatali le saofai se’i mae’a ona suesueina le talosaga apili. Faaalia e se tasi o suli o Natuitasina sa malilie uma e faataatia le faamoemoe se’i mae’a le talosaga apili. Peitai o le po o le afiafi o le Aso Tofi lea na savalia ai e le mamalu o matai o Malie le afioga Faamausili Moli ma nisi o suli o Moli ma fofola iai lo latou finagalo ina ia faatino pea le faafotu tupu. E faia le feiloaiga lea ae ua taoto le poloaiga le tumau mai le Pelesetene o Faamasinoga o Fanua ma Suafa. Peitai na faaauau lava le saofai.

O le pogai lea o le tuuina atu e le faamasinoga o le mataupu i leoleo e suesueina le le usitaia o le poloaiga ma faia ai loa moliaga o le contempt of court poo le a’itui i le finagalo o le faamasinoga.

O matai ua molia ua aofia ai ma le susuga Seiuli Ueligitone o le faipule o le itumalo o Sagaga le Usoga o se matai o Malie. O isi ua faia iai moliaga o Faamausili Moli, Maualaivao Pepe, Maualaivao Pat Ah Him, sa avea foi ma faipule o le Palemene, o Auimatagi Saoloto, Auimatagi Faafetai, Auimatagi Afi Faamausili, Faamausili Siona, Faamausili Chris, Muagututagata Peter, Tulasunui Umutaua, Tulasunui Ulaese, Tulasunui Sanele,  Tuatafu Iafeta, Salepo Fonoti. E lei mafai ona maua uma suafa o matai ua molia e leoleo. Faaalia e leoleo o le maea o su’esu’ega na taunuu ai i le faia o moliaga o matai o Malie.