Molia le atalii o se leoleo sinia i le toso teine

Ua faia nei le moliaga e tasi o le solitulafono o le faamalosi o se tamaitai faasaga i se atalii o se leoleo sinia o le matagaluega o leoleo ma falepuipui e mafua i le tele o faitioga faasaga i le faatinoga o tiute o leoleo i le taumafai e natia le mea na tupu i le lotoa o le Iunivesite Aoao o Samoa i le Papaigalagala i le lua masina ua mavae. Faaalia e le komesina lagolago le susuga Papalii Li‘o, e le moni faitioga i le taumafai o leoleo e toso suesuega ma taofiofi le oo o le mataupu i le faamasinoga e mafua ona o se alo o se leoleo sinia o loo tuuaia i le mataupu na aafia ai se tamaitai aoga o le iunivesite aoao a le atunuu.
Peitai ua iai le talitonuga o nisi ana le malosi faitioga i le mataupu e le toe gaioi leoleo e faia suesuega atili ma molia le atalii o le leoleo sinia. Ua maea ona faia se faatoesega ma se ifoga a matua o le tamaititi o loo tuuaia i le aiga o le teineititi ma ua talia. O le gaioiga lea na faaalia muamua ai e le komesina lagolago o Papalii Li‘o, na avatu ai ma le tusi a le teineititi na talosagaina ai e toe ave i tua lana tagi, ae peitai ua le o le tulaga lea ua tulai mai, ona e iai le talitonuga e le tatau i leoleo ona talia le toe faaui i tua o le tagi ona e matuia le soligatulafono, aemaise o le na aafia na taofia i le falemai mo togafitiga.
Faaalia e le komesina lagolago o le sui sooupu foi lea o le matagaluega o leoleo ma le au faasalalau, ua malie le tamaitai na aafia e molimau e lagolago le moliaga ua faia e leoleo. O le a taofia pea ona faailoa lautele le suafa o le ua molia seia faatali le taimi e taunuu ai le mataupu i le faamasinoga. O se fiafia na faia i le masina o Mati na faailoga ai le atoaga o le 25 tausaga talu ona faavae ma faatu le Iunivesite Aoao a Samoa, na tupu ai le faalavelave i le tamaitai aoga.
O solitulafono e aafia ai ni ifoga ma ni faatoesega e faia e aiga o i latou ua tuuaia e amanaia ma aloaia e le faamasinoga i taimi e faia ai ni faaiuga i mataupu e oo i luma o le faamasinoga, faapei o moliaga o le toso teine. Peitai e seasea ona toe faauiina i tua e leoleo se tagi i se solitulafono faapea, seia vagana ua musu le tamaitai na aafia e molimau e lagolago ai se soligatulafono faapea na aafia ai.