Molia faipule Tautua Samoa, le usitaia faaiuga

Ua sauni faipule e toaiva o le vaega faaupufai a le Tautua Samoa i le tauaofiaga a le Palemene o le a toe usuia i le aso 17 o le masina fou o Aukuso, ma o le fonotaga foi lea a le fono aoao faitulafono o le a faia ai se faasilasilaga a le Fofoga Fetalai e tusa o le le usitaia e faipule o lea pati o lana faaiuga na soloia ai o latou nofoa, e pei ona maea lana faaiuga i le aso 29 o Me a o lumanai le aso 15 o Iuni na ulufale faamalosi ai sui o le Tautua Samoa i le maota fono. O lea faasilasilaga a le Fofoga Fetalai o le a ia faailoa ai le molia o faipule e toaiva i le le usitaia o faaiuga a le palemene le contempt of parliament.
O le komiti o amioga taualoa a le fono aoao o loo aofia ai le alii Palemia ma le taitai o le itu agai, o le a latou iloiloina moliaga ma faia se fautuaga mo se faaiuga e tuuina atu i le Palemene mo sana ioega. Faaalia e le Fofoga Fetalai le tofa Tolofuaivalelei Falemoe Lei‘ataua, e leai se agaga o le nofoa e tulituliaupu ia sui mamalu o itumalo faafaipule, peitai e tatau i sui uma o le palemene ona faaaloalo ma amanaia le mamalu o le Palemene o le atunuu, lea e tatau ona usitai i faaiuga ma ona tonu fai.