Na faatumulia le hall a le Kalapu taalo a le Weymouth Cosmopolitan Club i Manurewa, i le tufatufaga faailoga sa faia ai a le kalapu soka mo fanau laiti a lea foi faaitu o Aukilani, i le aoauli o le Aso Sa, aso 16 o Setema.
O se vaaiga matagofie le taupati atu o mātua e molimauina taumafaiga a nai fanau, ae pau le itu na ese i le vaai a le tusitala, ona e mātele lava i mātua palagi, o Initia ma Maori, ae pe na o le tasi lava pe lua ni mātua Samoa sa filofilo ai.
O le alii laitiiti Samoa o Eneliko Vaotuua, o loo taalo i lana ‘au, le 9th Grade Pumas, ma sa manumalo le latou au i le siamupini o lenei tausaga mo lea vaega. Na matauina le fiafia o le atalii i le manumalo o lana au atoa, aemaise foi sa ia maua se pine ma se tusipasi e aloaia ai le mataina o lana taalo i le latou au, o se itu sa faafiafiaina ai foi nai ona tuaa (grandparents) le susuga ia Peter Vaotuua ma le faletua ia Marieta. E pei lava o isi uma tamaiti sa maua faailoga faapitoa i lea aso, o le moemitiga foi lea a le alii o Eneliko, ia oo mai le aso o le a ia ofuina ai le jersey paepae mo le ausoka a le atunuu, le NZ All Whites.
O le faamalosi a le komiti faafoe o lenei kalapu mo mātua uma sa auai i lea aoauli, ina ia onosai e unai mai fanau i toleniga, ina ia faaleleia atili o latou tomai i lenei taaloga o loo naunau i ai. E momoli ai le faamalo a le Samoa Times, i le alii o Eneliko ma lana au atoa, le 9th Grade Pumas mo le ausia o le siamupini o lenei tausaga.
