O le laeiina e se alo o Samoa na soifua a‘e i atunuu i fafo o lenei foi laei faa-Samoa moni, ua avea lea o se suiga fou i lona soifuaaga e suia ai foi ma atili faatagata matua ai ona lagona ma manatu.
O se saunoaga lea a lenei alii talavou ua faasuafaina e lona aiga. O lana foi lea miti na faailogafesili ma faa‘ato le magā pea i lona tuputupu a‘e, pe faamata e na te mafaia e lona malosi ona tatali le tiga. Peitai na toe tali lava o ia, “ioe e mafaia” o le viiga la e foi pea i le Atua ona ua ia ausia ma le manuia lea foi tulaga.
Na amataina i le sauniga lotu puupuu na saunia e le susuga i le Tiakono o le LMS Toe Fuataina mai Aukilani, le tofa ia Faletuai Lealofi Onosai Sa‘ena.
Na mae‘a ona feagai lea ma le samaina o le pe‘a, e pei ona sioa ai papalagi ma nisi e fou i le silasila a o tata‘e le fuamoa e le tufuga ma faapea ona uu ai loa le tatau.
Na matuai tapisa ma pisapisao le aofia a o tatagi mai le musika e faaeva ai le tatau a le tofa ia Matāfai Tavita Sa‘ena, i la latou siva Samoa ma ona tuafāfine ua mae‘a foi ona taina a la malu, tamaitai o Maleta ma Nofolevaoalii.
O le agaiotupu poo le matua o faiva sa faia le galuega, o le susuga ia Aukuso ma le falefa o le aiga Salemalama e alaala i le Setete o Niu Sa Uelese.
Ua avea le laei Samoa moni ua faaee atu i le tofa ia Matāfai Tavita Sa‘ena, ua o se mitamitaga i lona faletua le tamaitai o Melissa ma nai ona alo ae sili ai ona faafiafiaina ai o ia.Na faia lea samagā tatau i le aai o Gold Coast i le Aso Toonai aso 2 o Iulai ina ua mae‘a le 2 vaiaso talu ona mae‘a le galuega.
O tofa ia Matāfai Tavita Sa‘ena e alaala lava i Gold Coast, o nai ona tuaa o Faletuai Lealofi Onosai ma le faletua ia Sili Emele Sa‘ena mai Taga ma Lefaga, a o loo alaala i Aukilani Niu Sila.
