Na faapaia ma sama malofie ma malu a nisi o alo ma fanau i le aai o Melepone i le Aso Toonai na tuanai atu. O le mitamitaga sili i nai o latou tuaa ma aiga, ona o le naunau o nei alii ma tamaitai e fia laei i le laei Samoa moni, aemaise o le sagisagi fiafia e avea i latou ma avefu‘a e faalauiloa lenei tu ma le agaifanua ua tautaua ai Samoa e lē gata i le Vasa Pasefika ae o tulimanu e fā o le lalolagi.
Na maua se feiloaiga ma se tasi o uo mamae a la tatou auaunaga o se uo mamae foi a nisi o tuaa o nei alo ma fanau, le susuga ia Fasavalu Penitito ma ia saunoa ai, o le tele lava o taimi sa ia fesoasoani ai a o faagasolo le galuega fitaituga a le susuga ia Su‘a Faalavelave, ma ia faamalosiau ai i fanau nei ina ia onosaia le tiga o le au, auā e ui ina maini ma tiga, ae mulimuli ane avea ma mitamitaga sili i o latou soifua tuputupu a‘e o ni tamalii Samoa.
Faafetai le loto tele, malo le onosai, o lena ua tau lau o le faamoemoe, ua outou laei i le tatau a le taulealea Samoa moni, ma le malu a le tamaitai Samoa moni. O outou māamā na.
Alofaaga mai o tou mātua, Lilomaiava ma Neta Tanuvasa, Tanuvasa ma Tuatasi Folasā, Rockylane ma Lagifaatafa Anapu Penese, Alo ma Marietta Sakaria.
