Fonoifafo Nancy McFarland Seumanu sa faapaleina i lea po

Ua mae’a ona filifili le Tausala lalelei o Samoa i Niu Sila nei na te faaauauina le tauaveina o le pale Miss Samoa NZ i le tausaga 2019 seia oo atu i le tausaga 2020. O le po o le Aso Faraile o le vaiaso ua mavae na faaee atu ai le pale o le Miss Samoa New Zealand mai le taimaitai ia Cecilia Tufuga Fatu sa ia tauaveina lea matata o le Miss Samoa New Zealand mai le tausaga ua mavae 2018 i le 2019 i le tamaitai ua manumalo nei i le tauvaga o le sailia o le tausala o Samoa Niu Sila le tamaitai ia Fonoifafo Nancy McFarland Seumanu. 

O le faapaleina ai o le tausala tamaitai poo le Miss Samoa New Zealand ia Fonoifafo Nancy McFarland Seumanu i lona tofiga fou ina ua mae’a le faamoemoe i le po o le Aso Faraile, na faaalia ai lona lagona fiafia ina ua iai se isi laasaga fou i totonu o lona olaga. Na lagona foi lona fiafia ina ua ia vaaia le auai atu o le mamalu o le atunuu ua agai atu e lagolagoina lenei faamoemoe i le sailia o se tausala Samoa Niu Sila e fai ma sui o Niu Sila i le tauvaga lea laa fai ia Setema. E lē o sona malosi na mafua ai ona manumalo i lenei tauvaga, ae o faamanuiaga ia mai i le Atua mo lona ia foi tamaitai talavou lea ua mafua ai ona seei mai i lenei tofiga mo Samoa i Niu Sila. Ma o le viiga e faafoi lea i le Atua auā o ia na mafua ai lenei tofiga.

Dejealous Sili Palota Kopa i le taimi o lana taleni, o ia foi lea sa first runner up

I le taimi nei o lea ua ia tauaveina le pale o le Miss Samoa Niu Sila, ua ia vaavaai foi ma taumafai e faataoto se fuafuaga mo ana tiute ma galuega tauave i le tausaga mo le komuniti a Samoa i totonu o Niu Sila e tautua ai lona atunuu i Aotearoa nei e tusa ai ma tofiga ua ia te ia. O lana galuega i le taimi nei o loo galue o se fomai asiasi (visitor nurse) e vaaia fanau aoga mai le 5 tausaga e oo atu i le 18 tausaga i totonu o Aukilani.

E iai la lona lagona fiafia e telē se avanoa e mafai ai ona galue fesoasoani i totonu o le komiuniti Samoa ma fesoasoani i tagata ma aiga Samoa e ala i lana galuega o loo fai nei. E mafai ona ia tautuaina Samoa i ona tofiga ua aumai e ala i le avea o ia o le Miss Samoa New Zealand i luga o lana galuega o loo galue ai foi i totonu o Niu Sila nei. 

Gloria Ah Lin sa manumalo i le Best Sarong, o ia foi lea sa second runner up

Talu ai ona o lea faato’a mae’a ona filifilia o ia e avea ma Miss Samoa New Zealand, ma e lei ma’oti mai ai se tapenaga a le komiti faafoe o le Miss Samoa New Zealand mo le tauvaga tele i Samoa ia Setema. Talosia ia oo atu ai i se fonotaga a le komiti i se taimi o muamua ua iai se ‘au (team) e mafai ona latou galulue faatasi e fesoasoani i ana tapenaga mo le tauvaga tele i Samoa. O ia lava latou ua iai lava lona lototele e sauni ai i le faamoemoe lea i Samoa auā se sailia o se Miss Samoa i Samoa, ma o loo iai foi le lagolago malosi a lona aiga mo ia i lea faamoemoe.

O le tauvaga sa iai i le faaiuga o le vaiaso na molimauina ai le faatumulia o totonu o le maota o Samoa i Magele i le mamalu o le atunuu aemaise o aiga sa lagolagoina o latou alo ma fanau sa tauva i le sailia o se Tausala Samoa Niu Sila. E toalima tamaitai lalelei sa faia i ai le filifiliga mulimuli o le sailia o se tausala. O le tamaitai ia Nofoagaoalii Me Fale 24 ona tausaga mai le afioaga o Saasaai, Falelima ma Satapuala. O Fonoifafo Nancy McFarland-Seumanu 23 tausaga, mai le alalafaga o Letogo, Avao, Aleisa, Salelologa, Letogo ma Malaeime. O Dejealous Sili Palota Kopa 23 tausaga mai le nuu o Faleseela Lefaga, Faleasiu, Malie ma Fasitoouta. 

Leagatonu Faleola Apineru sa third runner up

O Gloria Ah Lin 24 tausaga mai le afioaga o Papauta, Solosolo, Nofoalii, Vaiusu ma Saleaula, ma Leagatonu Faleola Apineru 20 tausaga mai le alalafaga o Nofoalii, Gagaifolevao Lefaga ma Saleilua Falealili. 

O le polokalame o le po sa fai ai le tamaitai poo le afioga ia Tofilau Yolande Ah Chong ma fofoga o le afiafi ae o le susuga le faafeagaiga ia Rev Fatuatia Tufuga sa tatalaina le polokalame i le sauniga lotu. 

O le saunoaga autū o le afiafi na saunoa i ai le afioga i le Konesula o Samoa ia Faolotoi Reupena Pogi i tamaitai tauva i le tāua o le avanoa ua latou maua, ma o se avanoa lelei lea e siitia ai le tulaga ma avea ma lu’itau ia i latou i nisi o tomai fou pe a avea se tasi ma Miss Samoa New Zealand. E tele ni tiute o le a galue ai pe a maua le avanoa, ma o le a galulue faatasi foi ma nisi o tatou tagata e lē gata i a’oa’oga, ekalesia aemaise o faalapotopotoga eseese, ma o avanoa lē aumaua ia o le tulai mai o le teine talavou e avea ma teine tauva i tauvaga faapenei o se lasaga tāua tele lea mo tamaitai talavou. Faatasi ai ma faamanuiaga a le Konesula i se tamaitai o le a pale mai i le tofiga Miss Samoa Niu Sila i lenei tausaga seai oo atu i le tausaga fou.

Nofoagaoalii Me Fale sa fourth runner up

O le saunoaga a le afioga i le Faatonu o le Miss Samoa New Zealand ia Ulalemamae Te’eva Matafai na ia faafetaia ai le alofa ma le agalelei o le Atua ona o le faamoemoe sa lupe ma atofaina a’o lenei ua mafai ona faataunuuina i le manuia. 

Ua 28 tausaga talu ona faatautaia pea lenei faamoemoe i totonu o Niu Sila, ma o se taimi umi lenei savaliga o faatautaia pea lenei faamoemoe. Momoli foi le agaga faafetai o le afioga i le faatonu ia Ulalemamae i kamupani sa latou lagolagoina lenei tauvaga faatasi ai ma lana faafetai i tamaitai e toalima lea ua fai i ai le faiga filifiliga mulimuli mo se Miss Samoa NZ.

Sa maualuga ma matagofie le sailiga o se Miss Samoa NZ i le lolofi atu o tagata ma faatumulia ai totonu o le maota o Samoa aemaise ai o faafiafiaga eseese sa suifefiloi ai polokalame o le po.

Fonoifale ma Dejealous i le taimi ao faatali le lauina o le faaiuga o le tauvaga

O le iuga o le tauvaga sa iai le po, na tulai mai ai le tamaitai ia Nofoagaoalii Me Fale i le tulaga lima (4th runner up), o Leagatonu Faleola Apineru i le tulaga fa (3rd runner up), o Gloria Ah Lin i le tulaga tolu (2nd runner up), o Dejelous Sili Palota Kopa i le tulaga lua (1st runner up) ma o ia foi lea sa manumalo i le interview ma le taleni ma le tamaitai ia Fonoifafo Nancy McFarland Seumanu ua manumalo ma faapaleina nei i le Miss Samoa New Zealand ma o ia sa mauaina le faailoga o le Personality Award, ma le Best Siva Samoa.