E ui ina va i vasa ma mamao ala, ae lē mafai ona faafiti se auauna i se valaauina i le galuega faatala‘i auā le laveaiina o agaga.
O le mafuaaga foi lea o le autovaa mai o le susuga i le faafeagaiga ia Pr Olando ma le faletua ia Elizabeth Pule mai Kanata ona o se misiona e faapitoa lava mo le autalavou a le Ekalesia Aso Fitu o le toe Afio mai i Kuiniselani sa faataunuuina i Logan.
E lua vaiaso sa feagai ai le faafeagaiga ma lea galuega lelei, o le faamalosia lea o tupulaga talavou lalovaoa a le ekalesia i Afioga Paia a le Atua aemaise soo se tupulaga sa fia faafofoga.
Sa vaaia le faatumulia o po taitasi i le autalavou faapea ē matutua, ma na iu manuia lea faamoemoe; e to‘a 35 talavou sa papatisoina.
O le tele o tupulaga ua tele ni a‘oa‘oga sa latou maua i lea foi failauga faapitoa.
O le Aso Sa, aso muamua o Aukuso sa potopoto ai le ekalesia atoa faapea faafeagaiga lava o le ekalesia mo se taumafataga tele, ma faamavae atu ai i le susuga ia Pr Olando ma le faletua.
Ua faamoemoe o se aso o lenei vaiaso o le a toe taliu atu ai i laua i Kanata i nuu ua aumau ai aemaise ekalesia o nofo tapuai mai. Ia manuia tele le faigamalaga pe a toe taliu atu Pr Olando ma le faletua ia Elizabeth.
