Misia ‘Fats’ e uso i Ausetalia

O le vaiaso nei e faia ai toe sauniga o le afioga Papaliitele Peter ‘Fats’ Fatialofa i Aukilani, ma o loo gasolo atu pea faamaisega ma alofaaga mo ia ma lona aiga mai paaga ma uo a le kapeteni muamua o le Manu Samoa. E lē gata i lea o nai uso na latou taaalo i le Manu Samoa ua aumau nei i Ausetalia.
I Ausetalia nei o loo manatua pea e le Wallaby le Afioga Papaliitele ‘Fats’ i le taaloga ma le Manu Samoa i le Ipu o le lalolagi na semanu e manumalo ai Samoa 3-9.
O le alii kapeteni ia Papalii i lea taaloga na matauina lona tulai mai e unai le au a le atunuu ma lototetele ai i le lelei o le latou puipui na lē sao ai Ausetalia i le laina sikoa.
O se aso timu ma maseesee ae lei faatamala le Manu Samoa e ui e iai se avanoa na ono sikoa ai ma ni sala na lē manuia sa ono sili ai o latou ‘ai.
E ui i lea faia‘ina mataina 9-3, ae na sao lava le Manu i le kuatafaino i manumalo mataina ia Uelese ma Argentina. I le mae‘a o lana kapeteniina o le Manu i lana taaloga faagalo gata ma le Olopeleki i Eden Park i le 1993, na masii mai ai le Manu i Ausetalia nei lea na maoae ai ana manumalo mataina ia Kuiniselani, Sini XV ae na o le taaloga faitaulia (test) na faia‘ina mo‘amo‘a ai Samoa i le felesi o le Ualapi na faatalitali atu i le taaloga faaiu.
Na matauina e tagata le agamalie o saunoaga a Papaliitele i lana saunoaga i le uma o le taaloga na ia faapea ai, o le manumalo a Ausetalia i le 74-3 ailoga a toe foi i Samoa i le vaalele ae o le toe alo lo latou paopao (vaa), o uiga mālie nei o lenei toa o Samoa e faagalo gata ai.
“Ua misia oe uso, faafetai mo le avanoa na matou tautua ai mo le Manu Samoa a o e kapeteni Papaliitele, e lē galo oe,” Matamua Filipo Saena.
“Faafetai Papaliitele mo fautuaga i taimi o taaloga i le Manu Samoa e manatua pea lau taaloga faaiu i le 1996 ma Fiti i Suva ma lau fautuaga, taalo a oe i lau taalo masani ma aua ne‘i iai se sasi,” Faavaivai Fanoai.
“E lē galo oe Papaliitele Fats i le tele o fautuaga ma fesoasoani i le atinae mai o a matou taaalo i le aufili U20. E manatua pea oe,” Faapaia Fetineiai.