O le uluai tausaga lenei ua lē faataunuuina ai ia Ianuari le Misasā masani a Kolisi a’oga a le Katoliko i Kuiniselani e pei ona masani ai le taimi lenei i tausaga uma.
Na fuafua o le Aso Sa 13 o Ianuari 2019 peitai na faataunuuina i le aso 29 o Tesema 2019 ma faamavae atu ai ma le afioga ia Patele Epati Tamati a’o lei malaga atu ma galue nei i le vaaiga o Monike i Vailima i Samoa.
Na faatumulia e lē gata o sui mai Kolisi nei, ae faapea i nisi sui o le ekalesia sa auai atu. Na osia ma faia lea sauniga i le Palisi i Bracken Ridge (St Joseph and St Anthony).
Na amata le Misasā na taitaia e le afioga ia Patele Epati Tamati ma o le sauniga faaiu foi lea a’o lei malaga ese atu ma Ausetalia.
Na faataunuuina polokalame masani e pei o le momoliina o le taulaga sa faatinoina lava e sui taitasi mai a’oga e 4 Tama ma teine tuai faatasi ma se saunoaga faalaeiau na faamalosia ai asosi e 4.
O St Mary’s sa feagai ma le faatautaia o polokalame o le Misasā o le 2019 lea sa faia ia Tesema 2018. O Tama tuai o le Malisi lea o le a host i le 2020. Saunoa Patele e faamamafa i taitai ma sui o asosi, “Ia aua ne’i faavaivai ae ia lototetele i le auaunaga ma ia tumau le lotogatasi ma le fealofani, tautuana ia faatumauina le agaalofa ia faifai pea ma ia aveavea’i. Ia aua le faalogolgotiga ia faamauaa ma ia maua le loto fesoasoani ma pulupululima faatasi e māmā ai se avega.
Na faaiu i lana pese sa lagiina na matuai misia ai e alii ma tamaitai kolisi aoga a le Katoliko ae lēf gata i lea o le aofia sa faatasi atu. Na valaaulia le aofia i se iputi e fiafia ai ma talatalanoa a’o lei taumavae.
Ua iai le faamoemoe e toe talanoa laulau o asosi e 4 i se taimi ona iloa ai lea o se laasaga fou ona sa avea ma faufautua le afioga ia Patele Epati ma faamalumalu iai latou a’o lenei ua iai le suiga tele.
Peresetene o Kolisi a’oga Katoliko Tama ma Teine Tuai i Kuiniselani
St Paul VI (ua suia nei mai le Paul VI sa iai muamua) – Tala Nimo
St Mary’s – Pearl Tupua
Chanel College – Fonomua Jake Pale
Marist Brothers – Leafinealii Tofā Maiava
