E tusa ma le tasi le miliona tala le tau aofai o le lagolago a le malo, le faalapotopotoga a le Malo o le SIFA, le komiti o Petipetiga le TAB ma le kamupani telefoni feaveai o le Digicel, ua latou opogi ma lagolago malosi ai le malaga taamilo a le Manu Samoa i Peletania, Kanata ma Farani i le masina fou.
Faaalia e le Ofisa sili o le Iuni lakapi a le atunuu, o le tuuaofaiga atoa i le tulaga tau tupe o lea lagolago, o le a totogi ai ma alauni o tama o le ‘au.
O le feiloaiga a tusitala ma le faiaoga ulu faapea le taitai malaga a o lei tuua le atunuu mo le malaga atu e faamaopoopo le tatou ‘au mo lea malaga taamilo, na faaalia ai e le faiaoga o Steven Betham, e leai lava se isi faamoemoega o tapenaga, o le manumalo lava. Peitai e faigata tele taaloga faitaulia o le a feagai ai ma ‘au a Farani ma Uelese ona o nisi o aulakapi malolosi i le Tier One poo aulakapi lelei pito i luga.
O le suiga e tasi ua faailoa e le faiaoga ulu, o le avanoa lea o se tasi o faiaoga lagolago mo le forwards o Tom Conventry ona o ni tuatuagia tāua, ma ua avanoa ai lea tofiga e aunoa ma se isi e toe sailia i ai.
Peitai ua faailoa e le faiaoga ulu o loo gafatia e faiaoga uma ua filifilia le tauaveina o le malaga a le Manu Samoa, ae o le tausaga fou e faato‘ā avanoa mai ai le tasi lea o faiaoga lagolago.
O le filifilia o se tasi o alo o le atunuu sa avea ma faiaoga o le ‘au a Aukilani o le Blues, le susuga Pat Lam na faaalia e le faiaoga ulu, o se avanoa tāua o le a maua ai foi lana fesoasoani mo tapenaga a le tatou ‘au aemaise o Pat Lam le uluai Samoa ua oo i se tulaga faiaoga ulu o se aulakapi o loo tausinio i le taamilosaga lakapi tele o le Super 15.
