Mo le tou silafia, o le vaiaso nei i le Aso Lulu i le High Court a Aukilani, o le a ou toe foi ai i le fale faamasino i le mataupu a se Ekalesia lea e lei mae‘a i le tausaga na tea nei ia Tesema.
O le faamasinoga ia Tesema sa ta atu i le Samoa Times ona sa iai le sui o le Samoa Times i le fale faamasino, sa ia lipotiina taualumaga a vaega e lua a lea Ekalesia ua vaeluaina.
E tāua le laga o lenei mataupu ona o le tele o tagata lotu o loo iai mafaufau sese, pe faaseseina foi i ni fautuaga i vaega nei tau Ekalesia:
E tusa pe iai se faavae tusitusia (Constitution) a se Ekalesia aoao, e faapea e uumia e le Ekalesia aoao le pule i meatotino ma le faiga o le galuega a Ekalesia taitasi e i lalo o le faamalu a lea Ekalesia aoao, ae afai e lē sa‘o se faaupuga i totonu o le faavae, ua afaina ai aiā tatau a tagata lotu, e mafai ona talepe ma lē faaaogāina i le tulafono ni vaega o le Constitution, e sese. E leai se tulafono e faapea e lē mafai ona faia se faatautau, ma lē mafai ona fesuiai ma soloia ni vaega o se faavae (Constitution) leaga o le faavae a le Ekalesia aoao.
O se faataitaiga, afai o se faavae o se Ekalesia lotu EFKS o le faavae na tusia i Malua ae o faaaogā i Niu Sila nei, e mafai ona tavete, soloia, ma lē faaaogāina le faavae na tusia mo le faaaogāina i Samoa, pe a challenge i le fale faamasino i Niu Sila.
Aua le faaseseina tagata lotu i faamatalaga faapea e pule mai Malua i meatotino i Niu Sila nei. E i lalo faalapotopotoga o i Niu Sila i tulafono a Niu Sila. E lē aiā tulafono a Niu Sila i ni meatotino i Samoa, e pulea meatotino i Samoa i tulafono a Samoa.
E iai le vaega o le tulafono e ta‘u o le Conflicts of Laws. Ou te tautala ma lo‘u talitonu e sa‘o la‘u fautuaga, auā o le vaega lenei o le tulafono o loo o‘u maua ai le Masters of Commercial Law, sa ou aoga faapitoa (study) i le eseesega o tulafono a Niu Sila, Samoa, Saina ma Europa i tulafono e puipui ai Intellectual Property (aiā i meatotino e iai puipuiiga o pese, tusitusiga ma vailaau na e maua le faaaoga ai o lou mafaufau).
E leai se eseesega o le Conflict of Laws i mea tau lotu ma le puipuiga o meatotino a oe na e maua i au gaulega ma lou mafaufau (Intellectual Property).
E matuā sese foi manatu ia e faaalia afai o se faifeau na tofia mai i Malua, poo se isi Ekalesia aoao, a fai se mea sese e le faifeau ua vaelua ai le Ekalesia, e lē pule le vaega lea e tu ai le faifeau, ma faapea o le itu lena e uuina le pule.
I luga o le tulafono a Niu Sila, e leai se aiā a se faifeau e na te faatonu faamalosi ai se Ekalesia e fai se mea e lē fetaui ma manatu o le Ekalesia, ma lē fetaui ma tulafono a Niu Sila. Afai la e vaeluaina se Ekalesia ona o se mea na fai e le faifeau, e tutusa aiā tatau a itu e lua ua vaeluaina, i meatotino o i totonu o le falesa, hall, fale o le faifeau, ma mea tautupe.
Afai foi ua o ese se isi itu, ua tulai lava latou ma o, i le latou loto malie e mulimuli i se faifeau ua faatulai po ua aveese sona tofi faifeau, ona o nisi tulaga e lē oo i ai tusitusiga nei, o tagata na i le latou loto malie, ua o ese ai. E leai se latou aiā e o ai ma aveese ni meatotino a le Ekalesia.
O se Ekalesia ua vaeluaina, ma tulai se isi itu e tau ina fai i se isi falesa poo se hall a latou sauniga ina ia tausi le filemu mo le taimi nei, e lē aveeseina le aiā tatau a tagata ia i meatotino a le Ekalesia. O le faaiuga lea na maua i le faamasinoga a Westmere Congregational Church ia Tesema 2010.
Ina ia manino le mataupu lea e i luga, ou te faamanatu atu e leai se pule a se faifeau i le faaaogāina e le aulotu o le falesa, hall ma le fale o le faifeau. I le tulafono, e pulea e trustees i lalo o se Trust le faaaogāina o meatotino. E oo i mea tau tupe, e pulea e trustees.
E tusa foi pe tofia le Public Trust e na te vaaia le faiga o ni tulafono e opogi ai le faaaogāina o meatotino a se Ekalesia, e leai se pule faamalosi a le Public Trustee e fai ai ni tulafono e lē talafeagai ma le faiga o le galuega a le Ekalesia atoa.
Totogi o le Aveina o Mataupu tau Ekalesia i le Fale Faamasino e Taugata:
E ala ona taumafai e faamalamalama atu mataupu ia e ta‘ua i luga, ina ia nofouta i ai tagata o i totonu o aulotu.
A ave mataupu nei i fale faamasino, e taugata ma lavelave. E lē gata i le taugata o totogi o le fale faamasino, ae taugata totogi o taimi o loia, auā e tuu uma isi galuega ae faitasi na o le faamasinoga lea e i luma o le fale faamasino i le taimi lea.
E lē na o le taimi o le loia e tu ai i luma o le faamasinoga e totogi, o le tele o taimi e totogi, o galuega ma suesuega faaletulafono e tusia i pepa e ave i totonu o le fale faamasino ae lei oo i le aso e fai ai le faamasinoga.
O loia e faigaluega ona o le tausiga o fanau ma aiga e pei lava o galuega eseese na e tou te faia, auā le fia maua o tupe e tausi ai a outou aiga.
E sili le puipuia i lo le togafitia. E sili le saili e le faifeau ma tagata o Ekalesia le fesoasoani faaloia i le taimi nei e faamalamalama ma fesoasoani e fesuiai pepa faaletulafono o faaalu ai galuega a le tou lotu. E laititi le taimi e alu ai, laititi le tupe e totogi. Atonu foi e laititi ai vevesiga i totonu o Ekalesia.
Atonu e iai nisi o outou e fia malamalama atili i mataupu o ta‘ua i luga. O le Aso Lulu o le a sau nei i le 10am i le High Court a Aukilani, o le a faaauau ai le faamasinoga a le Westmere Congregational Christian Church, lena sa i le pepa lata mai nei. Atonu e manaia foi le faalogo e maua ai manatu i mea tutupu a tou Ekalesia.
