O le taulotoaiga o le tausaga na tea nei na amata tuli ai le faasalaga faafalepuipui o se tasi o leoleo sinia, Fineaso Aimaasu, ina ua faamaonia ona moliaga o le faia o ni uiga matagā i se alii talavou faafafine sa nofosala i le falepuipui o le tupulaga talavou i Olomanu.
O Tesema o le tausaga lava na tea nei na fofogaina ai le talosaga a Fineaso e ala i lana loia, susuga Ameperosa Roma, ina ia toe suesueina le mataupu atoa ma ia valaau le molimau a se tasi o taulealea o loo nofosala i le falepuipui o ia lea o Lui Wenterstein. O ia lea o le molimau autū a leoleo i moliaga ua faamaonia, ona o ia lea na ia vaaitino i gaioiga na faia. Peitai na faaalia i faamaumauga a leoleo i le talosaga a le itu tagi, ua toe iai se isi suiga o le faamatalaga a Lui na ia faailoa ai ia Fineaso i le falepuipui, e lē sa‘o lana molimau. O le mafuaaga lea o le toe oo o lenei mataupu i le faamasinoga lea sa fofogaina i le aso 21 o Tesema 2010. I le toe amatalia o galuega a le faamasinoga i lenei tausaga fou 2011, na toe valaau ai le talosaga a Fineaso ma lana loia.
O le vaalauga lea i le Aso Gafua na tea nei, 17 o Ianuari 2011 na faaalia ai e le alii loia o Ameperosa Roma, ina ia toe faaui mai i tua le talosaga.
O sailiga a le tusitala i le fia iloa atili o le mafuaaga ua toe faaui ai i tua le mataupu na fesiligia ai le Sui Komesina o leoleo, o ia o le sooupu le afioga Leaupepe Fatu Pula mo se faamaninoga o le mataupu.
“Ua faailoa mai e le ofisa o le Loia Sili a le Malo ua toe faailoa atu e Lui (molimau autū) na mafua ona ia faia lea faamatalaga ona sa iai se isi malosiaga i tua atu sa tauanauina o ia, ae e sa‘o uma lava lana molimau na faia i le taimi na suesueina ai molimau a leoleo e lagolago ai moliaga o Fineaso”. O le saunoaga mai lea a le sui komesina i le sui o le Samoa Times i Apia. O le lē faaauauina o le talosaga a le itu tagi ua toe faaauau ai foi ona tuli le faasalaga o Fineaso i le falepuipui.
O le fofogaina o lenei mataupu sa faia lea i luma o le afioga i le Faamasino Sili, Patu Tiavaasu‘e Falefatu Sapolu.
E lei mafai ona faaauauina le moliaga o le faasotoma faasaga i lē ua nofosala i le taimi o le faamasinoga ia Iulai o le tausaga ua mavae, ona o le tagai a le faamasinoga sa lē mafai e le itu a leoleo ona tuuina atu ni molimau e lagolago ai.
