“Ua ou tuuina atu le mataupu lenei i leoleo ma le Loia Sili mo ni suesuega”
Ua amatamea se mataupu ua tuua‘ia ai le lē faaaloalo o ni lomiga ma ni faasalalauga a ni nusipepa i lo tatou atunuu, e pei ona faamatalaina i se finagalo o le Fofoga Fetalai o le Palemene, o se lē faaaloalo ma ua lē amanaia ai e ia nusipepa le saolotoga o le Palemene e faia ai ana faaiuga i ni mataupu, a o loma le tuuina atu i le fono aoao faitulafono i le masina fou o le Tulafono taufaaofi e faavae ai le faatuina o se komiti faatonutonu poo se Media Council mo le faatonutonuina o galuega a tusitala ma le aufaasalalau i lo tatou atunuu.
O le lipoti a le Pule ma Suetusi sili a le Malo o loo lipotia ai galuega a matagaluega ma faalapotopotoga a le Malo sa faataatia i le Palemene i le masina o Iuni o le tausaga ua mavae, e lei talanoaina e le Fono Aoao, ae sa tuuina atu i se komiti faapalemene o le mafuaaga lea o se finagalo faalauaitele o le Fofoga Fetalai le susuga Laauli Leuatea Polataivao, ua ia fautuaina ai le aufaasalalau i nusipepa, leitio ma televise i le atunuu e taofia ni faasalalauga ona e aafia ai le saolotoga faapalemene poo parliament privileges.
O se manatu o le faatonu o le nusipepa o le Newsline na afea ai ni vaega o le lipoti a le suetusi sili. O le nusipepa o le Samoa Observer na ia faasalalau le lipoti atoa i se tasi o ana lomiga faatasi ai ma ni lipoti na muamua faasalalauina.
Ua faaalia e le Fofoga Fetalai o loo mausali le vaega 11 o le faavae e faasino i le saolotoga o tagata uma e aofia ai ma saolotoga o galuega o loo faia e itutino o loo faia le faiva o le faasalalau faalauaitele o faamatalaga i mea eseese e tutupu, peitai na ia faaalia i lipoti e talanoa loa i le saolotoga ma aiā faapalemene, e iai tulafono e pa puipui ai le itu lea aemaise e faasino tonu i ni mataupu a le Palemene e lē tatau ona faasalalau ma lomia a o lei faia i ai ni felafolafoaiga a le fono aoao faitulafono.
E lei logosa‘ia e le nusipepa o le Samoa Observer le tusi muamua a le Fofoga Fetalai na fautuaina ai i lo latou faasalalau o ni vaega o le lipoti. O le isi a latou lomiga na faasalalau ai le tusi a le Fofoga Fetalai ma faasalalau ai ma le lipoti atoa a le suetusi sili a le Malo.
O le mafuaaga lea o le finagalo o le Fofoga Fetalai e tuuina atu loa le mataupu i le Loia sili ma leoleo mo se suesuega. Na fesiligia le Faatonu sinia o lea nusipepa le afioga Savea Sano Malifa i sona finagalo i le mataupu ma le faaiuga a le Fofoga Fetalai. Peitai na saunoa mai le faatonu sinia e lē faia sona manatu i ai ona o lea ua faia i ai suesuega a leoleo.
E pei ona silafia e le aufaitau o loo iai le tulafono e faasino ia i latou o loo umia nusipepa o loo aiaia ai le tatau i se nusipepa ona faailoa atu i ni suesuega i latou e maua atu ai ni faamatalaga.
O le aiaiga lea o le tulafono o loo iai se faatatau a le Loia sili o loo nafa ma le fausia o le ata faataitai o le tulafono faatonutonu mo faasalalauga e aveesea, ae taatia le faatonuina o se nusipepa poo se televise ma se leitio i le pitolaau a le faamasinoga na te faia se faaiuga faapea.
Peitai e iai le masalosaloga e ono faaaogā le aiaiga o lea tulafono i sailiiliga ua faia nei e saili ai poo ai le tagata poo ni tagata na latou ave le lipoti a le suetusi sili a le Malo i le nusipepa ma avanoa ai ona latou faasalalau vaega o loo faaalia i le lipoti.
