Ua saga faatumau le mausali o le pule a le aiga o Faumuina Tutuila i lo latou eleele i Tanugamanono ina ua aumai le faaiuga a le Faamasinoga o Fanua ma Suafa i Mulinuu i le Aso Faraile ua mavae.
O le faaiuga a le faamasinoga ua teena ai itu talosaga e tolu sa latou finauina o latou e iai le pule o le fanua.
E fā itu tetee o suli e aiā uma i le fanua sa autu i ai le suesuega a le faamasinoga, lea sa aofia ai ma le Itu tetee a Afu Faumuina Tutuila Fereti, o i latou o loo nofoia le fanua.
O le Itu tagi muamua sa aofia ai Atoa Tuilaepa Kisona, Tuumaalii Fasi Leota, Tuumaalii James Fua, Matua Asotasi Samuelu, Apelu Lipine, ma Palaialii Louis.
O le Itu tagi 2 sa aofia ai, Asotasi Vaa Falealili, Tupuola Faauuga, Moa Tupuola Sepelini II, ma Vaivai Saufoi Tupuola Sepelini II.
O le Itu tagi 3 sa taitai mai ai Palaialii Tuvale Atoa Te‘o, Tuumaalii Iose Grey, Sootuli Ulugia, Pepe Falefitu Smith, Asotasi Phillip Ulugia, ma Liu Joseph Smith.
O le Itu tetee muamua sa aofia ai Atoamafuaiupolu Tavita Tafao Lalau, Vaipua Tuiavii Setu Vaipua, Leamanaia Atoa Foemua Saili, Siilata Fualilia Fainu, Foemua Faiilagi Saili, Seumaloisalafai Afele F Saili, Mailo Maioa Atoamafuaiupolu T Tafao, ma Fonoimoana Gafa Vaipua.
O le Itu tetee 2 o Taimalieutu Owen, Itu tetee 3 o Afu Faumuina Tutuila Fereti, Selesa Faumuina Tutuila Fereti, Seipua Faumuina Tutuila Fereti, Papalii Francis Fepuleai, Sauaga Seiuli Tulei, ma Savali Faumuina Tutuila Fereti.
O le Itu tetee 4 sa tulai mai ai Atoa Penitito, Mulitalo Esekia, Galumalemana Nuufou Petaia, Lelevaga Kereta Petaia, ma Suafoa Atoa Moeono Penitito.
E lē o se taimi muamua lea ua oo ai le mataupu faasino i le fanua ua igoa o Seutatia i Tanugamanono i Foga a le Malo poo le faamasinoga. Peitai o le suesuega na faia i le tusa nei ma le vaiaso talu ai, sa autu i le sailiga o le pule.
I faamaumauga o le faaiuga a le faamasinoga ua folasia ua faaalia ai o le Itu tagi muamua sa latou finauina o le fanua o Seutatia o se vaega o Mataimoana i Tanugamanono ma o le fanua e pulea e le suafa Atoa i le itu paepae o Atoa Simi.
O le latou mau foi e lē aiāina e le itu paepae o Atoa Foemua lea sa tulai atu ai Atoa Penitito ma suli o Faumuina poo le itu a Afu Faumuina. Sa tausisi manatu o le itu talosaga muamua o le fanua lenei na afua mai lava lona puleaina e Atoa Soonanofo lea sa tulai atu ai le ituaiga o Atoa Simi oi latou ia.
E lagolagoina e le Itu tagi 2 lea taofi e pei ona finauina e le Itu tagi muamua, e faapea foi i le fono faapipii a le Itu tagi 3, ma e lilifa lava o latou finagalo i le pule na tuuina e le faamasinoga ia Atoa Soonanofo seia oo mai ia i latou le itupaepae lea o Atoa Simi.
O le Itu tetee 1, 2, 3, ma le 4 na faaalia lo latou matuā teena o le pule e pei ona finauina e le Itu tagi 1, 2, ma le 3.
O lo latou talitonuga o le pule a Atoa Soonanofo ua lē o toe iai se malosiaga ona o lea ua mae‘a ona faamanino e le faamsinoga le uiga o lea pule, e pei ona tuu i le suafa Atoa, na ona faamamalu, ae o le fanua lava ia o Seutatia ua mae‘a ona tuuina atu i le suafa Faumuina le pule e faaaogā ma nofoia ai.
O le taunuuga atoa o iloiloga a le faamasinoga ua manino mai ai, o le fanua atoa o lona puleaina i le nofoia ma le faaaogāina ua iai lea i le suafa Faumuina ae pule faamalumalu ai le suafa Atoamafuaiupolu o le itupaepae o Atoa Foemua. O lona uiga ua teena le mau a Itu talosaga uma sa aofia i le faamasinoga ua mae‘a. Ua poloaina e le faamasinoga le tausisia o tuaoi ua mae‘a ona aiaia i nisi o faaiuga faasino lava i lenei fanua.
Faaalia e le tina o Afu Faumuina, o lea ua manino atili nisi o faaiuga ua mae‘a a le faamasinoga, ma ua mautu ai lava le pule e faasino i le eleele.
O le tina o Afu ma lona aiga sa faatulai ese ona o le feteenaiga e pei ona lipotia i le tele o nisi o lipoti a nusipepa ma leitio faapea fale faasalalau tau televise i Samoa.
O le taunuuga o le faamasinoga ua faaalia ai foi le faafetai o Afu i le tumau pea o le finagalo o le faamasinoga i le mea moni.
