Maunu tuinanau o le tino i le telefoni feaveai

O le pito laau a leoleo pe a molia se tasi i se moliaga faasolitulafono o le tuuina atu o molimau e lagolago ai se soligatulafono ina ia faamaonia e aunoa ma se masalosaloga tatau. O se itu taua lea i tapenaga a leoleo ma loia a le Malo e finauina se solitulafono. O le alii o Tavita Mikaele sa tuuaia i lona faamalosi o se tamaitai 21 tausaga le matua. O lana gaioiga e faapea mai leoleo i le latou mau sa tuuina atu i le faamasinoga, na faatino i se togavao i se fanua i tua atu o le faleoloa o le Mr Lavalava i Fugalei. O le afiafi o le Aso Toonai, 10 o Novema 2007 i le tea o le 6 i le afiafi na taua e leoleo na tulai mai ai lea soligatulafono.
O le tamaitai na aafia sa malaga ane i le maketi i Fugalei mai Vaitele-uta ma le faamoemoe e fia malaga i lo latou aiga i Falealili. Na fetaui i le maketi le tamaitai ma se tasi o tamaitai la te masani ma talatalanoa ai i le vaega o loo faatali ai pasi. O le talanoaga lea na tatagi ai lana telefoni feaveai ma talanoa loa i lana uo tama e pei ona molimau le tamaitai i le faamasinoga. Na vaaia e le tamaitai i le taimi lea le savali atu o le alii o Tavita ma se‘i loa lana telefoni feaveai. O le gaioiga lea na mafua ai loa ona taumulimuli e aumai lana telefoni, a o savali atu le alii o Tavita agai i le nofoaga o iai le faleoloa o le Farmer Joe o loo faafesagai ma le faleoloa o le Mr Lavalava i le isi itu auala e latalata i le auala sima (bridge) o loo iai i lea vaega o le taulaga.
A o savali atu le tamaitai e tuliloa le alii ae sa faaauau pea ona savali ma sopoia le alasima, lea sa tu mai ai ma valaau atu i le tamaitai e alu atu. Na faamatala le teine i le faamasinoga sa faapea atu le alii o ia e fia faatino ona tuinanauga ia te ia, peitai e tasi lana tali e leai. Na faamatala foi le tamaitai e le masani i le alii o Tavita ma na te le iloa foi. O le gaioiga na faia e le na molia na iu ina oo ai lana savaliga i tua atu o le faleoloa o le Mr Lavalava o loo iai se togavao. O le nofoaga lea na faaalia e le teine na la toe faataututu ai i le manao lava e toe faafoi atu lana telefoni feaveai, peitai na tau tonu ai le tui a le alii i lona auvae, ma palasi ai loa i lalo ua matapogia.

Solitulafono o le faamalosi teine
O le nofoaga lea sa finau leoleo na faatino ai e le ua molia le soligatulafono o le faamalosi o se tamaitai e faia se faigaaiga e aunoa ma le loto malie i ai. Peitai na faaalia e le tamaitai e malamalama ane mai lona matapogia, ua leai ni ona lavalava (telenoa) ae ua lava toto uma se vaega o lona tino. Sa ia faalogoina le pepe atoa o ona tino i le taimi lea i lana molimau sa faia se faigaaiga ia te ia. Ae lei silafia e le tamaitai poo le ua molia na faatinoina lea gaioiga poo se isi tagata, e pei ona sa tuliloa ai e le loia sa tulai mo le alii o Tavita Mikaele. Ina ua uma ona faia lavalava o le tamaitai sa savalivali ane i le aualatele i Fugalei ma agai loa i luma o le faleoloa o Farmer Joe, lea sa ia vaaia ai le alii ua molia. Fai mai lana molimau na toe agai ane le alii ia te ia, ae o le taimi lea na ia tapa ai loa se fesoasoani a ni alii se toalua e faigaluega i le Farmer Joe, ma vili ai loa le ofisa o leoleo.
Sa faamatala le tamaitai i lana molimau sa ona pe faasuaava le alii o Tavita ma ona mata ua mumu e foliga i lana vaai sa ula ni ana maruana. O le itu faigata lea i le moliaga a leoleo o le toso teine poo le faiaiga faamalosi ma se tamaitai ona e lei silafia e le tamaitai poo le ua molia na faia le gaioiga ia te ia poo se isi tagata. O le lipoti foi a le fomai na siakiina le tamaitai e le o mafai ona faamaonia ai nisi o tulaga e tatau ona manino ai sa faatino se faigaaiga. O le taunuuga na oo i ai iloiloga a se laulau o faatonu poo assessors o le le faamaonia lea o le moliaga o le toso teine ma le moliaga o le faaoo manua (actual bodily harm).