“Sa taumafai Filipaina e unai i le isi taulealea le solitulafono”…faamasino
O le vaiaso nei i le Aso Faraile, 25 o Iuni 2010 o le a lauina ai se faaiuga a le Faamasinoga Maualuga i moliaga o Tagaloasa Filipaina Faisauvale o Faleatiu. Ua faamaonia le moliaga o le umia o laau faasāina, umia o aupega matautia ma le umia o ni pulufana, ae ua lē faamaonia le moliaga o le faaaupegaina i se aupega matautia (armed with a dangerous weapon).
O le alii faamasino o Justice Pierre Slicer mai Ausetalia na tauaveina suesuega o molimau i moliaga o Tagaloasa Filipaina Faisauvale, ma nisi taulelea e toalua sa molia faatasi i le solitulafono o le umia o laau faasāina o maruana.
O le alii o Taei Fotu Sinapati o se tasi o aiga o Tagaloasa (nephew) lea na faaalia e le alii faamasino i lana faaiuga tusitusia sa taumafai Tagaloasa e māunu se alii leoleo (attempt to bribe a police officer) ina ia unai le solitulafono i le alii o Taei.
O le aso 8 o Aukuso o le tausaga e 2009 na fuafua ai se osofaiga a leoleo i le nofoaga sa iai se pisinisi a Tagaloasa. Sa vaaia e leoleo se taavale o le ituaiga o le Cherokee lanu mūmū e masani ona vaaia o fealuai ai lē o loo molia.
Na oso i fafo o le taavale le toalua faapouliuli o lē ua molia ma maua ai e leoleo se tamai fana o le ituaiga o le 22 calibre pistol i lana tamai ato ta‘ita‘i.
O totonu foi o le taavale na maua ai e leoleo ni pulufana. O nisi o ututau e faatagaina faaletulafono a o nisi ututau e faasā. Na faaauau ona agai leoleo i Vaitele faatasi ai ma Tagaloasa lea na taunuu i se lotoā ae vaaia ai e leoleo ni alii se toalua o taufetuli agai i le vaega i tua o le lotoa o iai se fale‘apa. O le tasi o ia taulealea o le alii o Taei Fotu Sinapati na vaaia e leoleo o ia togi i fafo o le lotoā se afifi. Na maua mulimuli ane le afifi ma iloa ai o se taga o loo iai i totonu lau ma fatu maruana.
I le suesueina o molimau na finauina ai e Tagaloasa le molimau a leoleo o le laau malosi na ia umia. Sa faaalia e lē ua molia i lana molimau o leoleo na latou fafau se gaioiga na maua ai le laau malosi ia te ia, auā ua leva ona sue e le malu o le Malo se mea e maua ai o ia ona o solitulafono sa masalomia ai lona tagata.
Peitai i le faaiuga a le faamasinoga ua teena ai lea molimau a Tagaloasa. Faaalia e le alii faamasino o Slicer, e toatele leoleo na iai i le osofaiga sa faia foi a latou molimau ma faailoa ane ai o le laau malosi lava na maua i lē ua molia.
Na faaalia e lē ua molia i lana molimau o pulufana e leai sona silafia sa i totonu o le taavale, ae atonu o ni pulufana na ave i ai e le inisinia na fai ai lana taavale. Na teena foi lea molimau ma ua lē talitonuina e le faamasinoga. Fai mai le alii faamasino ua tetee lē ua molia ae o ututau sa faigofie ona iloa e leoleo i le taimi na taofia ai le taavale a Tagaloasa Filipaina.
O maruana na maua i lona fanua i Vaitele-tai ua leva ona ia silafia e pei ona faaalia e le faamasino auā e pine faamau lea i le tele o taimi e asiasi o ia i lea nofoaga.
Ua toe tuli nei le faasalaga soloatoa o lē ua molia i le falepuipui i Tafaigata ma faatalitali ai se faaiuga o ona moliaga ua mae‘a ona fofogaina molimau a leoleo faapea le molimau a lē ua molia.
