CEO o le EPC i le fonotaga ma le autusitala

O le vaiaso lenei o loo faapea mai le Malosiaga Faaeletise, e tatau ona faaleleia ai uma nisi o masini ma vaega moomia ma le pe soo o le eletise i le atunuu. E oo mai i le vaiaso lenei o loo fai ma pē le paoa. O loo tau faasoasoa le paoa i nisi o vaega o le atunuu. Ae o le feiloaiga a le autusitala ma le Pule o le EPC, na fesiligia ai i nisi o mafuaaga o le pē o le paoa i le vaiaso na tea nei. O atugaluga a le mamalu o le atunuu o a latou meatotino ua tele ina faaleagaina ona o le pē soo o le paoa.
E leai foi se fuafuaga faatulafonoina a le faalapotopotoga e maua ai ni taui mo aiga ua faaleagaina ni a latou meatotino ona o mafuaaga e lei mafaufauina se’i vagana ai ua faamaonia ua faaleagaina ona o se galuega na fai e le EPC ona faatoa maua lea o se taui.
O le 2018 na faatuina ai le faleeletise i Fiaga, ma le manatu i lena vaitaimi, o le malosiaga e 28 uati, e gafatia ai ona auina atu le eletise i le atunuu atoa. O le manatu foi i lena vaitau, poo ā lava faalavelave faalenatura poo ni lologa foi, e gafatia lava e le 28 uati lea le atunuu atoa.
Peitai na ona oso lava o faititili ma emo uila, pē loa ma masini ia na manatu i ai e lē afaina. “O le silasila a le EPC, na fausia loa le faleeletise lea i Fiaga, ona tele lea o le improvement o le eletise ona ua gafatia e le faleeletise i Fiaga Samoa atoa, peitai o lea ua ese foi le vaega e agai mai i ai le climate change ua agai mai i uila ma faititili ma ua afaina ai le afi i Fiaga”.
Saunoa le Pule Sili, o se lesona foi lea mo le pulega aemaise le Malosiaga ua silasila mamao i ai, e lē tatau ona faalagolago na’o Fiaga e gaosi ai le eletise, ae e tatau ona iai se isi fuafuaga.
O le 2018, lea na mae’a ma faalauiloa ai le galuega fou lea i Fiaga, ma le faamoemoe lava lena e lē tatau ona toe afaina afi o loo i Fiaga. O lona uiga e foliga mai e lei oo le silasila a le pulega, i le ituaiga malosi lea na malolosi ai le emo ma le pā pā o faititili, na ala ai ona pē le paoa i le atunuu.
E tusa ma le 22.7 miliona tala le faatupega atoa o le faleeletise i Fiaga faatasi ai ma masini ia na matuā afaina i le emo o uila ma pā pā faititili. E lua afi na faaleagaina i le emo o uila ma faititili, atoa ai ma maa na faaaogā e teu ai le malosiaga, lea na faaleagaina. Ina ua tupu le faafitauli, na toe see ane le malosiaga poo le EPC ma toe faaaogā le paoa i Tanugamanono e auina atu ai le eletise i le atunuu atoa. E lua afi o loo lelei pea i Fiaga.
Peitai ua iai le fuafuaga e tapunia loa Tanugamanono mo se taimi tumau, ona o le leotele o le ūū o masini, aemaise e tau lalata ane i ai le mamalu o le atunuu o loo alala ma papaaao ai.
Na saunoa le Ofisa Sili, e faaono toe silasila le pulega ina ia toe faatau mai nisi masini e suitulaga i masini ia ua faaleagaina. O lona uiga o isi tupe a le au totogi lafoga ia o le a faatupe ai, ona o le leai o se vaai mamao.
Saunoa le Ofisa Sili, e lei gafatia e protection o masini ia na teena le malolosi tele o uila ma faititili. E lei mafai ona faamaonia mai e le Ofisa Sili, pe fia se tau o mea ua faaleagaina, ae a fua i le 22 miliona tala ia na fausia ai le eletise i Fiaga e lē o se tamai tupe.