E talitonu le ofisa o galuega sauniuni mo taimi o faalavelave faalenatura faapea le Matagaluega o Leoleo, e leai se soifua e maumau pe a faalogo ma usitai tagata uma i lapataiga ma fautuaga.
Na amata loa ona vaaia taaviliga o matagi malolosi ua agai ane i motu o Uea ma Futuna lea e tau lalata ane i Falealupo i le itu i Sisifo o Savaii, amata loa ona faasalalau lapataiga ma fautuaga o vaega e sauniuni i ai le atunuu.
“E lei mapu lava lo matou ofisa i faasalalauga sa alu i luga o TV ma leitio”.
O le finagalo lea o le tamaitai ofisa sinia o Filomena Nelson mai le vaega o galuega i taimi o faalavelave faalenatura.
Sa faapea e na o le faalavelave i Vailele i le Aso Sa, 23 o Ianuari 2011 na maliu ai se tagata lea e faapea na o ai ni taulelea e toalima e matamata i le fafati o galu maualuluga a o sau lapataiga o le afā o Wilma na aafia le soifua.
Peitai o le Aso Gafua na tetele ai tafega ma lologa ma timuga ina ua faaleaogāina lapataiga o le afā o Wilma, na maliliu ai isi tagata e toalua ma maua ai le toatolu o tagata na fano soifua i taimi faaletonu o le tau sa feagai ma Samoa.
O se tamaititi 9 tausaga na ave i le malosi o le tatafe o vai lea na maua lona tino maliu i totonu o se alavai sima.
Fai mai lipoti o le tamaititi na tafea lona seevae ona alu lea e aumai ae ona ua malosi lava le tafe na mafua ai ona maua i ‘ave malolosi o le vai ma aafia ai loa lona ola.
O se tamaitai e tau faaletonu le mafaufau na maua lona tino maliu i se vaega o se alavai i Fugalei e fesootai ma le vaitafe i Vaimoso.
Faaalia e leoleo o le molimau a aiga nofo latalata i lea vaega e faapea, o le tamaitai na vaaia e le faifeau EFKS i Fugalei o savali ane ma agai i tua.
E lei leva ona savali ane ae sau le tala e iai le teine na alu atu lava oso loa i lalo o le vai a o tatafe malosi.
Na logo leoleo ma faia ai sailiga peitai na fiu e lē maua. Na faato‘ā maua le tino maliu o le tamaitai i le afiafipo ua tea le 8 ina ua maualalo le vai ma faaitiitia lologa. O le atunuu atoa sa logosaia lapataiga ma fautuaga ae o le talitonuga o leoleo, e iai lava isi e lē popole ma pei e faaataata lafoga i le latou faafofoga fautuaga. O le toatolu ua maliliu ua faamauina o soifua muamua ia ua aafia i le amataga o lenei tausaga fou mai ni faalavelave faalenatura a o iai Samoa i le tau o afā ma matagi malolosi e faato‘ā mae‘a i le masina o Mati. O le tau lenei e amata mai ia Novema o tausaga taitasi.
