E lē tau fesiligia o tupe maumau a le atunuu ua alu i le alii Nigeria o William Okoro ona ua mae‘a le faamasinoga na sulufai i ai lea alii mo se taui tupe.
Ua faaalia e le Palemia o ia foi o le Minisita o le vaega o femalagaiga, susuga Tuilaepa L Sailele Malielegaoi, o ni tupe maumau a le atunuu ma le Malo ua alu i le totogiina o le faamasinoga na mafua i le tagi a le alii Nigeria o William Okoro. O le finagalo o le taitai o le Malo na agiga i luga o le polokalame a se tasi o ualesi faasalalau poo se leitio i le atunuu i le vaiaso ua tuanai.
Ua faaalia e se molimau faatuatuaina, o se tasi o tagata faigaluega sinia i le Malo, e tusa ma le $268,000 se vaegatupe ua faaaluina e le Malo i lea mataupu.
O lona vaevaeina e $103,000 ua totogi atu i le alii Nigeria o se taui mai lana tagi na finauina ai le $10 miliona. O le totogi o lana loia e $155,000 ma le tau atoa o le toe foi atu i Nigeria o lea taulealea e totogi foi e le Malo e $10,000.
“Ana lelei le taulimaina e leoleo o le mataupu, e lē tulai mai i se tulaga faapea ua alu maumau ai ma seleni a le atunuu”. O le finagalo lea o se tasi o ofisa sinia o le Malo ua lē finagalo e faailoa lona suafa.
O le vaiaso ua mavae sa toe oo atu i le Faamasinoga Maualuga le mataupu e faasino i le totogi o le faamasinoga mo le itu tagi e patino lea i le tau na faafoe ai e le ofisa loia o le Toa Law le finauga a William Okoro.
E tusa ai ma molimau na oo mai, e tusa ma le $250,000 ma ona tupu le totogi o le alii loia na faatautaia le mataupu sa tuuina atu i le faamasinoga. Peitai o le mae‘a o le iloiloga a le alii faamasino o Justice Slicer, na faaitiitia ai lea pili i le $155,000.
E lē o noatia ai i le faaiuga le maliega i le va o lē e ana le mataupu ma le loia i se faamanuiaga e maua e le loia ma o se tu ma se aga masani lea i mataupu tau faamasinoga e finauina ai ni taui.
E lē o iloa pe o iai se isi faaopoopoga o le seleni a le ofisa loia na faia le mataupu o maua mai i le $103,000 o le taui mo Okoro, ma e lei manuia sailiga mo le fia maua o se finagalo o le alii loia sa ia tauaveina le mataupu ae e iai le talitonuga o le tusitala, o le itu lea e fitoitonu i le va o le loia ma lana kalaieni poo le client.
O loo finauina e le Itu agai le malo ina ia faia se suesuega e sailia ai poo ai le matagaluega a le Malo na faatamala i le taulimaina o le mataupu ia Okoro, ua mafua ai ona oo i le faamasinoga ma aumai ai le faaiuga ua faamaonia ai sa sauāina lea alii a o nofo taofia i le falepuipui i le vaaiga a leoleo, faapea ai ma le taofia e aunoa ma se moliaga faasolitulafono.
Na faamaonia foi e le faamasinoga le toesea o ni meatotino a lea alii Nigeria e pei o sana uati taulima, o lana telefoni feaveai, o ni ona lavalava, o lona tusifolau ma sana tupe e tusa ma le $4,000 Amerika.
O ia meatotino uma sa leiloloa mai le vaaiga a leoleo a o nofo taofia lea alii i le taimi muamua ona o se moliaga o le faia o ni gaioiga tau faasese ma le gaoi.
E lei faamaonia le moliaga ma faaleaogaina ai e le faamasinoga ina ua lē mafai e leoleo ona tuuina atu ni molimau e lagolago ai le tagi. Sa faamaonia foi i le tagi mo se taui a le alii Nigeria le faaoolima o ni leoleo ia te ia, lea sa saisai ai ona lima o ona vae ma lona gutu i se mea faapipii poo se tape, ina ua ave i le malaevaalele mo le toe aveesea ma Samoa.
E lei taunuu ona ave le alii i se malaga a le Ea Pasefika ona sa musu le kapeteni poo le pailate ona o tulaga sa ia vaaia i le alii o Nigeria lea na saisai ai lona gutu ma ona lima faapea ma vae.
