O le Aso Sa na faamae‘a ai le taamilosaga faavaomalo a le Oceania/Commonwealth Powerlifting Championships lea sa faia mai i Aukilani i le vaiaso atoa na se‘i mavae nei, na masii mai ai le ausiisii uamea mamafa a Samoa e auai i lea tauvaga.
E to‘a 12 le autaalo ma le faiaoga mai le Samoa Powerlifting Federation na fai ma sui o Samoa e tauva, peitai o se tulaga maualuga le siitia o le taalo a tamafanau a le atunuu. O lea taamilosaga sa faia mai i Aukilani ma sa faagasolo mo le vaiaso atoa i le Vodafone Event Centre i Manukau.
E lē o se taamilosaga faigofie le faamoemoe ona e 14 atunuu tetele o le lalolagi sa auai e aofia ai Ausetalia, Egelani, Sikotilani, Aferika i Saute, Tuvalu, Northern Ireland, Trinidad and Tobago, Pakistan, Kilipati, Nauru, Samoa, Kanata, Niue ma Fiti.
O le tele o atunuu nei ua masani i tauvaga faavaomalo faapenei, ae mo Samoa, o le toatele o i latou e fou i le taaloga, o le ala foi lea o le lē masani tele o le tatou atunuu i lea ituaiga taaloga.
Peitai o le Powerlifting o se tasi lenei o taaloga pito i mamafa uamea o loo faaaogāina, e sili atu i le mamafa faatulagaina o uamea o loo faaaogā e le ausiisii a le Weight Lifting e pei ona masani ai.
Ae a tagai i le tulaga ua ausia e nei alo Samoa, o loo lotolotoi i le tulaga 10 pito i luga i le faatulagaga o tagata Powerlifting o le lalolagi, pau foi lenei o se autaalo a Samoa e faatupe lava e le tagata lona pasese na malaga mai ai, ma o aiga lava foi o le autaalo i Niu Sila sa api ai mo lenei taamilosaga ona o le leai o se fesoasoani tau seleni.
O le ala foi lea o se sailiga tupe na foai ai le mamalu o le atunuu i le taulaga faatau i Otara, e pei ona faamaopoopoina e le mafutaga a le SCOPA NZ, ona o le fia fesoasoani lava mo si a tatou ‘au. Toatele nisi o alo pepese ma le aufaafiafia a Samoa na tuu atu le lagolago e faafiafia ai i lea faamoemoe, aemaise o le auai atu o le afioga i le Konesula, Faolotoi Reupena Pogi e fesoasoani mo le ausiisii uamea mamafa a si o tatou atunuu.
Na molimauina le taalo malosi ma le lotonuu o alo ma fanau nei na fai ma sui o Samoa. E matautia le taumafai, e ui o nai vaiaso mulimuli o le latou tapenaga i Samoa, sa koleni ai i se faletaavale a se aiga ina ua lē maua se avanoa i gym sa masani ona faaaogāina mo toleniga ona o fuafuaga ma tapenaga a le Malo, ae o lea ua a‘e manuia faiva.
E sa‘o ai le upu e talasua ai le tupulaga, pe koleni i le gym pe koleni i le togavao e manuia lava taumafaiga a tamaiti suluie. E mae‘a le taamilosaga, manumalo i le 8 pine auro, 9 pine siliva, ma le 9 pine apamemea mo Samoa.
O le Aso Sa na faia ai le laugatogi ma le tufatufaina o pine. Na faamanuiaina ai foi le tamaitai o Matile Sitagata i se faailoga taualoa o ia o le Best Junior Female i le tauvaga lenei a le Oceania/Commonwealth Powerlifting Championships 2013.