Maualuga taleni musika a Fanau a le Pasefika

O le faamoemoe ua taunuu o le laau lea o le ola, o le viiga lea ma le faafetai i le Atua ona ua mafai ona faataunuuina le faamoemoe sa fau ao fau po. O le afiafi  o le Aso Toonai na mavae atu nei sa faataunuuina ai se koneseti tele a le Manukau Symphony Orchestra i le maota o le Vodafone Events Centre i Manukau. O lea faamoemoe o le faamanatuina lea o le 20 tausaga talu ona faavae mai le aoga, ma e aofia ai tagata mai atunuu eseese uma o le lalolagi o loo aoaoina ai i musika. E silia ma le fāselau tagata o le Pasefika na latou molimauina lea faafiafiaga. O le susuga ia Matatumua Opelone Ah Sam o se tasi o alo o le atunuu, o ia lea sa tusia pese ma ia tuufaatasia musika o lenei faamoemoe. O Matatumua e mai i le afioaga o Apia ma Faleasiu ae o loo galue nei o se faiaoga i le Iunivesite a Vitoria i Uelegitone.
Na ta‘ua e lenei tamalii o le atunuu, e na o le fā masina na ia malaga mai ai ma tuufaatasi lenei faamoemoe ina ua tapa atu e le Manukau Symphony Orchestra sana fesoasoani e ala i musika. O ia foi sa nafa ma le taimiina o pese i lea afiafi. O le Fofoga o le po o se tasi o tamafanau o le atunuu le tamaitai ia Yolande Ah Chong, faatasi ai ma le fesoasoani a nisi o alo o le atunuu ua iai le taleni ma le meaalofa pese. E 6 ni aoga sa mafai ona tuufaatasia, e aofia ai le aoga a le Kolisi o Magele, kolisi a Otahuhu, kolisi a Southern Cross, kolisi o De La Salle, o le kolisi a Marcellin faapea le kolisi a Dilworth Boys. E tasi le ekalesia sa auai, o le Ekalesia Faapotopotoga Kerisiano Amerika Samoa  mai Magele i Sasa‘e (EFKAS). O nei aoga uma ma le ekalesia sa mafai ona tuufaatasia ai se aufaipese tele lea sa silia ma le fitusefulu tagata. O se tasi o vaega na faateia ai le maimoaga, o tamaiti aoga eseese tulagalua a Otara lea na faaaogāina foi a latou taleni i le musika.
O se tamaitai mai Rotuma sa pese ai foi i lea afiafi ma se alo o Samoa sa fai ma taupou e taualuga ai le po. Na mae‘a ona sosoo lea ma le tufatufaina o ni teufugalaau e fai ma meaalofa mo i latou sa nafa ma lenei faamoemoe.