Maualuga sao tau aoaoga o Felela Malisi i Samoa

Ua ta‘ape le tumutumu o le mafutaga a tama ma teine tuai o le Malisi i Samoa sa malaga mai atunuu i fafo mo le faailogaina o le 125 tausaga talu ona taunuu uluai Felela Malisi i Samoa ma faavae aoaoga mo le fanau.
O se mafutaga sa molimauina ai le malosi o le loto Malisi o alo ma fanau sa aoaoina i Mulivai i Apia i lea aoga a le ekalesia Katoliko, aemaise o nisi o tamalii ma failauga ma le malosi o le atunuu sa aoaoina ai i le tele o tausaga ua tuanai. O se faaupuga faigofie e faamatalaina ai le vaaiga i foliga oi latou, Afai lava o oe o se Malisi e lē mafai lava ona aveesea le agaga o le Malisi (Once a Marist always a Marist).
O le Aso Sa 25 o Aukuso 2013 na amata ai polokalame o le 125 tausaga o le Malisi i Samoa lea na tatala i le sauniga o le Misasa Paia na faia i le maota poo le hall a le aoga a le Malisi i Mulivai i Apia.
Na lologo ai le aofia i se talaaga o le Malisi lea na saunoa le afioga ile Aki Epikopo, o Alapati Lui Mataeliga, o Felela mai Farani ma Siamani na uluai taunuu i Samoa i le tausaga e 1845. Na faavaeina ai loa aoaoga a le Malisi ae na iai ni faafitauli sa tulai mai i lea vaitau ma toe foi ai alii Felela.
Peitai o le tausaga e 1888, na toe taliu mai ai i Samoa ma faavaeina loa le aoga a le Malisi i Mulivai lea e oo mai lava ile aso o loo faaauauina pea. O uluai tausaga lava o lenei faatofalaiga a le ekalesia Katoliko sa faatuina muamua ai aoga a le Malisi i Moamoa le vaitau muamua lea na toe tapunia ai, seia oo ina toe faavae i le 1888 i le eleele ma le nofoaga o loo i Mulivai i Apia.
O le aotelega o saunoaga ma fetalaiga i le faailogaina o lenei aso fanau tāua, e fulisia lava i tala o mea na tutupu i taimi o aooga le toatele i le Malisi, aemaise o pulega a alii Felela mai fafo sa feagai ma le aoaoina o fanau a le atunuu.
O le sini lea o le saunoaga autu a le afioga i le Faamasino Sili, Patu Tiavaasue Falefatu Sapolu, i le tatalaina o le maota fogafalelua fou ua avea ma nofoaga o suesuega faasaienisi ma le potu tusi mo le aoga i Mulivai, ona o lana molimau o le maualuga o le sao o alii Felela sa aoaoina fanau a le atunuu lea ua tulai mai le toatele oi latou i tofiga lelei o le Malo, o ekalesia, ma faalapotopotoga aemaise o nisi ua lelei ma ola a latou atinae eseese e pei ona molimauina.
Saunoa le faamasino sili i le tāua foi o le sao o nisi o tama fanau a Samoa sa avea ma faiaoga ma galulue ile aoga a le Malisi i tausaga ua mavae, lea lava o loo molimauina i lenei taimi le galulue pea o nisi, a o isi ua tuua le Malisi ona o nisi fuafuaga, a o nisi foi ua fai i lagi le tuligasia.
O le meaalofa a le Malo i le faailogaina o le 125 tausaga o le Malisi e $50,000 ma ua faaopoopo i isi foi foai a le Malo ua mae‘a tuuina atu i le asosi a tama ma teine tuai o le Malisi mo atinae aua le ola aoaoina o fanau a le atunuu.
O le maota fou ua avea ma pine faamau o le 125 tausaga ua atoa o le Malisi, e silia i le miliona tala lona tau, pe a fua i le tau na manumalo ai le ofo a le konekarate o le Diamond Head e $910,000. O faaopoopoga o seleni mo le galuega ua tagi lava i lima.
O nisi o tamalii o le atunuu sa aoaoina i le Malisi ma o loo iai pea nisi i tofiga taitai o le malo, e aofia ai le afioga i le Tapaau Faasisina susuga Malietoa Tanumafili II, afioga Tupua Tamasese Meaole, Tofilau Eti Alesana, Tui Atua Tupua Tamasese Efi, Tuilaepa Sailele Malielegaoi, Patu Tiavaasue Falefatu Sapolu, Laauli Leuatea Polataivao Fosi Schmidt, ma nisi lava o tamalii o le atunuu o loo silafia e le toatele.