Maualuga sao o le 130 tausaga o aoaoga a le Malisi i Samoa

O le Pelesetene ma sui o le komiti a le Malisi o loo feagai ma polokalame o le faamanatuina o le 130 tausaga talu ona taunuu i Samoa aoaoga a le Malisi
O le Pelesetene ma sui o le komiti a le Malisi o loo feagai ma polokalame o le faamanatuina o le 130 tausaga talu ona taunuu i Samoa aoaoga a le Malisi

O tala faamaumau o le taunuu i Samoa o le lotu Katoliko ma sosoo ai ma le faatuina o le ulua’i aoga a le Malisi, o lea ua lau silafia e le toatele alo ma fanau sa aoaoina ai ma le tulaga lelei o aoaoga a le Malisi e fua i nisi o tupu ma e’e faapea tamalii o le atunuu ua umia tofiga ma tulaga maualuluga i pulega o le Malo, o pisinisi ma isi auaunaga.

O le Palemia o iai nei ma le Faamasino sili o nisi ia o tamalii na faafailele mai le olaga aoaoina i le Malisi. O le Aso Tofi o le vaiaso nei e tatala ai polokalame o le faailogaina o le 130 tausaga talu ona faatuina aoaoga a le Malisi i Samoa.

Na faaalia e le Pelesetene o le Malisi le afioga Tuatagaloa Aumua Ming Leung Wai, o le fatu autu o le faailogaina o ia tausaga e tele ona o le faataua ma le amanaia oi latou sa faavaeina olaga aoaoina mai le Malisi. O le faalapotopotoga foi o tama ma teine tuai o le Malisi o se faalapotopotoga pito toatele ona sui auai aemaise o se faalapotopotoga e ola ma lelei lona faafoeina. Ua tele foi atiina a’e a le atunuu ua fesoasoani iai le Malisi aemaise lava i taaloga.

O le Aso Tofi nei 13 o Setema o le sauniga o le Misasa Paia e faia i le Malumalu o Maria Imakulata i Mulivai i Apia i le taeao ona faagasolo ai lea o polokalame atofaina mo aso e fa. Na saunoa le Pelesetene o le Malisi e toatele tama ma teine tuai o alala ma aumau i fafo o le a auai ae o le toatele o sui o le Malisi i Samoa o le a fulisia iai le toatele o le a faamaopoopo atu ma auai i le faamoemoe.

O nisi o pine faamau o le Malisi e pei o le paipa inu sa i luma o le aoga laiti a le Malisi i Mulivai i tausaga e tele ua mavae ua faaigoa ai se tasi o sailiga tupe o le 130 tausaga. O loo manatua e le toatele ua matutua tausaga o le soifua lea paipa sa i luma o le Malisi, o le toatele e savavali agai i lea vaega o Apia e tulituli lava le fia taumafa ise vai i le paipa o le Malisi.

O nisi o alii felela sa faiaoga i le Malisi o loo soifua mai pea i le taimi nei ua avea foi ma faatumutumuga o se tasi o polokalame o le 130 tausaga, o faailoga faapitoa o le a tauaao.

O nisi foi sa aoaoina i le Malisi ma ua maoa’e lo latou tulaga ua seei ai i pisinisi ma galuega a le Malo o le a maua foi faailoga taualoa. O le Aso Sa 16 o Setema o le taualuga ai polokalame o le 130 tausaga. O le hall o le aoga a le Malisi i Mulivai o le a faia ai le toon i le  tele ma faamavae ai sui uma o le Malisi o le a auai.