Maualuga le tulaga ua iai le Ola Aoga o Fanau i Samoa

Sui o le Kolisi o Sagaga – Manumalo i Finauga (debate)

E fā aso o le vaiaso na tea nei na faatautaia ai e le Matagaluega o Aoga, Taaloga ma Aganuu se polokalame na mafai ona tauva uma ia i aoga i totonu o le atunuu, e lē gata mo aoga laiti poo primary schools ae faapea foi ma Kolisi Maualuluga. 

O le polokalame lenei o loo unaia ai le faitau tusi, o le tusitusi ma le mataupu faasaienisi (Samoa Schools Innovation for Literacy, Numeracy and Science 2019).

O lenei polokalame ua tolu ai lenei o tausaga talu ona faatautaia mai ai e le Matagaluega o Aoga, ma o se tausaga ese lenei le toatele o aoga ua mafai ona auai ai i tauvaga eseese e pei ona amata mai lava i le Aso Gafua seia faagasolo ai sailiga siamupini i le Aso Tofi o le vaiaso na tea nei.

O le autu poo le theme o lenei polokalame mo lenei tausaga,o le Ola poo le Life e pei ona faamatalaina ai e se tasi o ofisa sili lagolago o le Matagaluega ia Leota Valma Galuvao, soo se mataupu lava e aoaoina i totonu o potu aoga e iai lava le ola i nei mataupu ma e fesootai foi i le autu, o le Ola.

E silia ma le 1000 le fuainumera o fanau aoga mai Upolu ma Savaii faatasi ai ma pule aoga, o faiaoga ma mātua na mafai ona auai i nei aso e tolu e molimauina ai lenei polokalame. Ma o se polokalame aupito sili ona tele lenei a le Matagaluega faatusa atu i nisi o polokalame tau a’oa’oga na faatautaia muamua. E eseese vaega uma na faagasolo ai tauvaga taitasi e aofia ai tauvaga lauga i le gagana faaperetania, o le tauvaga lenei e se’i ai e sui taitasi le autu e faatatau iai lana lauga ona ave lea iai o le tasi le minute e tapena ai lana lauga (Impromptu Speech). 

O isi tauvaga e aofia ai solo mo le mataupu o le matematika (Maths Poetry).

O le tauvaga tusigatala poo le Essay. O le tauvaga e mafaufau ai le tama ma le teine aoga i se auala vave e foia ai se faafitauli poo le Problem Solving, o le taliina o fesili, o le faia ma le tuufaatasia o se poloketi mo le mataupu o le saienisi poo le science project. Faatasi ai foi ma se tasi o tauvaga na mataina lona faatinoina e ala lea i aoga na lautogia mo le sailiga siamupini, o le tauvaga o finauga poo le Debate.

Na tulaga ese le taupati mai o aoga laiti ma kolisi maualuluga mai nuu i tua o Apia aemaise ai o aoga na malaga mamao mai Savaii. Ma o se polokalame na matuā viia ai e le Minisita Lagolago o le Matagaluega ia Alaiasa Sepulona Moananu le loto tetele o le Matagaluega i lona faatinoina, aemaise o le sao o mātua ma aoga taitasi i le lava ona tapena ai o fanau aoga. 

O lenei polokalame na faamauina ai le siitia maualuga o le tulaga o le ola aoaoina o fanau i totonu o potu aoga mo mataupu eseese. 

O se tasi lenei o pine faamau o le suiga tele na faia ai e le Malo i nai tausaga ua alu, e ui na tele ai foi le tomumu o le atunuu. 

O lea suiga tele o le mafai ona faa-kolisi uma o aoga a Itumalo taitasi i nuu ma afioga i tua atu o Apia faatasi ai ma Savaii, ina ia mafai ona faa-aooga ai lava fanau a le Itumalo latou nai lo le toe omai mamao e aooga ai i Apia. 

Ao lei faia ai le suiga tele lenei a le Malo, na maitau lava i le tele o tausaga ua tuanai, e na’o aoga lava i le talafatai i Apia e pei o le Kolisi o Samoa, Kolisi o Avele ma le Kolisi o Sagato Iosefa e lalamua lava i soo se tauvaga a aoga, peitai o le suiga tele ua molimauina i lenei vaitau, le agai mai i luga o le taumafaiga a nisi o aoga e pei o le Kolisi o Lepa ma Lotofaga, o le Kolisi o Falealili, Kolisi o Anoamaa aemaise foi le Kolisi o le Alofi o Taoa mai Savaii, o le Kolisi o le Itu o Tane, Kolisi o Amoa ma nisi Kolisi i Savaii.

O le tele o faailoga o le tauvaga lenei a le Matagaluega o Aoga, Taaloga ma Aganuu i le vaiaso na tea nei, na sola ai ma manumalo i vaega taitasi nisi o aoga mai nuu i tua atu o Apia ma aoga mai le motu tele i Salafai. 

E toe faataunuu ai foi lenei tauvaga tele i le tausaga fou 2020.